Posta Shqiptare firmos marrëveshje bashkëpunimi me Postën Turke
Në datat 24-26 nëntor, një delegacion i Postës Shqiptare, i kryesuar nga Drejtori i Përgjithshëm i saj, Majlind Lazimi, po kryen një vizitë pune në Ankara dhe Stamboll me ftesë të Drejtorit të Përgjithshëm të Postës Turke, Osman Tural.
Në fokus të kësaj vizite është nënshkrimi i dy marrëveshjeve bashkëpunimi midis dy administratave postare. Firmosja e këtyre marrëveshjeve hap një kapitull të ri në intensifikimin e marrëdhënieve dypalëshe në fushat respektive si, modernizimin e shërbimit postar, aplikimin e teknologjisë së informacionit në shërbimet financiare dhe bankare, trajnimin e specialistëve të administratës postare shqiptare nga Posta Turke etj.
Gjatë takimit mes dy homologëve të institucioneve postare, iu dha rëndësi e veçantë marrëveshjes për platformën E-Commerce (tregtisë së mallrave online), e cila krijon potenciale të reja për qytetarët e vendeve përkatëse. Me aplikimin e kësaj platforme synohet të lehtësohen transaksionet online për shit-blerjet e mallrave të ndryshme ku postat përkatëse angazhohen në aspektin logjistik të shpërndarjes së produkteve.
Gjithashtu, u ra dakord të krijohen grupe të përbashkëta pune jo vetëm për zbatimin e këtyre marrëveshjeve, por edhe për të iniciuar projekte të reja me interes të përbashkët në sinkron me risitë teknologjike dhe trendet globale postare me objektivin madhor për të krijuar shërbime të reja dhe cilësore për qytetarët.
