Presidenti Nishani mesazh ngushëllimi Familjes Mbretërore të Arabisë Saudite

Presidenti i Republikës, Bujar Nishani, i ka dërguar Madhërisë së Tij, Salman bin Abdulaziz al Saud, një mesazh ngushëllimi për vdekjen e Mbretit Abdullah bin Abdulaziz.

“Madhëria Juaj, Me hidhërim të thellë mësova për ndarjen nga jeta të Mbrojtësit të Dy Xhamive të Shenjta, Mbretit Abdullah bin Abdulaziz.

Në emër të popullit shqiptar dhe në emrin tim personal, dëshiroj që përmes Madhërisë Suaj, t’i përcjell Familjes Mbretërore dhe popullit mik të Arabisë Saudite, ngushëllimet më të ndjera e të sinqerta.

Mbreti Abdullah ishte një lider vizionar dhe paqedashës, i cili do të mbahet mend për reformat e guximshme të ndërmarra në vendin e tij por gjithashtu dhe për përkushtimin e tij për promovimin e dialogut në Lindjen e Mesme, si dhe rolin e luajtur në arenën botërore dhe organizatat ndërkombëtare. Për shqiptarët, Mbreti Abdullah, ishte një mik i mirë që iu gjend në ditët më të vështira.

Ai do të mbetet gjatë në kujtesën e kombit shqiptar për ndihmën e çmuar që ka dhënë në kapërcimin e vështirësive ekonomike dhe forcimin e lidhjeve mes dy popujve tanë. Ju siguroj, Madhëria Juaj, se në këto ditë dhimbje dhe hidhërimi unë dhe populli shqiptar jemi pranë Familjes Mbretërore dhe popullit të Arabisë Saudite.” – përfundon mesazhi i Presidentit Nishani.

Mbreti i Arabisë Saudite, Abdullah bin Abdulaziz vdiq sot në moshën 91-vjeçare, njoftoi televizioni shtetëror saudit. Mbreti do të varroset pas faljes së mesditës në Riad.