Princi Harry i quan veteranët ukrainas të plagosur ‘shembuj për shoqërinë’ gjatë një vizite surprizë në Lviv
Duka i Sussex-it, në vizitën e tij të katërt në Ukrainë që nga fillimi i luftës, u takua me pacientë dhe staf në Qendrën Superhumans dhe luajti pingpong me një veteran 49-vjeçar nga Odesa
LVIV – Princi Harry i ka cilësuar veteranët ukrainas të plagosur si shembuj për shoqërinë, gjatë një vizite surprizë të dielën në Lviv, siç njofton Associated Press, duke theksuar se tek ata duhet të investohet edhe pasi të kenë lënë uniformën.
Vizita, e katërta e Dukës së Sussex-it në Ukrainë që nga fillimi i luftës dhe e dyta në qytetin perëndimor të Lvivit, u zhvillua në Qendrën Superhumans, një klinikë ortopedike që trajton ushtarë të plagosur dhe civilë. Harry, vetë veteran i ushtrisë britanike që ka shërbyer në Afganistan, ndoqi një ndeshje regbi në karroca dhe mori pjesë në një lojë pingpongu, ku u bashkua me një lojtar me krah të amputuar.
“Ia kërkova të luante dhe ai nuk refuzoi”, tha për AP-në Oleksandri, një veteran 49-vjeçar nga Odesa. Harry lavdëroi qëndrueshmërinë e ukrainasve dhe shprehu shpresën se lufta do të përfundojë së shpejti. “Pjesa tjetër e botës do të vazhdojë t’ju mbështesë”, u tha ai veteranëve. “Në mendjen time, ju tashmë keni fituar.”
Gjatë vizitës, Harry u takua edhe me Kostiantyn Vlasenkon, ushtarin e parë ukrainas që u evakuua nga vija e frontit me dron, i cili u plagos rëndë në luftime në shkurt dhe qëndroi 232 ditë i fshehur nga forcat ruse, duke përcjellë vëzhgime të rëndësishme. Harry e quajti atë “mbresëlënës”, ndërsa ushtari iu përgjigj me një fjalë: “kokëfortë”. “Kam një admirim dhe respekt të madh për ju”, i tha Harry atij, siç raporton Associated Press.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.