Princi saudit i kurorës bisedon me Trump-in dhe presidentin e Emirateve për sulmet e Huthi-ve

Princi saudit i kurorës Mohammed bin Salman zhvilloi të dielën në mbrëmje biseda telefonike me presidentin amerikan Donald Trump dhe me presidentin e Emirateve të Bashkuara Arabe, Sheikh Mohamed bin Zayed Al Nahyan, ku në qendër ishin sulmet e Huthi-ve ndaj Arabisë Saudite, siç njofton Al Jazeera, duke cituar agjencinë zyrtare saudite të lajmeve SPA.

Sipas SPA-së, gjatë telefonatës me Trump-in, princi i kurorës shprehu mirënjohjen e mbretërisë për mbështetjen e Shteteve të Bashkuara dhe për përpjekjet e tyre për vendosjen e sigurisë dhe stabilitetit në rajon, pas sulmeve të përsëritura të Huthi-ve ndaj aeroporteve dhe infrastrukturës së naftës saudite.

Edhe telefonata me presidentin e Emirateve u përqendrua te zhvillimet rajonale. SPA bëri të ditur se të dy udhëheqësit theksuan nevojën për konsultime dhe koordinim të vazhdueshëm, me qëllim ruajtjen e sigurisë dhe stabilitetit në rajon.

Telefonatat vijnë në një kohë kur Huthi-t e mbështetur nga Irani kanë shtuar sulmet ndaj Arabisë Saudite, ndërsa Riadi ka intensifikuar sulmet ajrore në Jemen. Vetëm pak orë më herët, një zyrtar i lartë saudit i tha Al Jazeera-s se mbretëria është gati për bisedime me Huthi-t dhe kërkon t’i japë fund luftës.