Prizren – DokuFest 2016 me 4500 aplikime

Për edicionin e 15-të të Festivalit Ndërkombëtar të Filmit të Shkurtër dhe Dokumentar, që do të mbahet në qytetin e Prizrenit, në Kosovë, nga 5 deri 13 gusht kanë mbërritur mbi 4500 aplikime.

“Ftesa për aplikim për edicionin e 15-të të DokuFest është mbyllur. Falënderojmë të gjithë 4500 aplikantët, të cilët kanë aplikuar me filmat e tyre”, shprehen organizatorët.

Bëhet e ditur se, programi i plotë i festivalit do të shpallet në fillim të muajit korrik. “Një numër i programeve speciale do të shpallen më herët. Festivali do të mbahet nga data 05 – 13 gusht në Prizren, Kosovë”, theksojnë organizatorët e DokuFest.

Në 24 nëntor 2015 ishte hapur ftesa për të gjithë autorët e dokumentarëve, filmave të shkurtër dhe animacioneve të aplikojnë me filmat e tyre për edicionin e 15-të të Festivalit.

Në DokuFest 2015 në qendër ishte tema e migrimit me filma nga e gjithë bota dhe rajoni. Nga 228 filma të metrazhit të gjatë dhe të shkurtër, 124 bënin pjesë në programet garuese.

DokuFest e nisi rrugën e tij në vitin 2002, me shfaqjen e një numri të madh filmash dhe me pjesëmarrjen e një publiku të gjerë, artistësh nga rajoni dhe bota, duke e shndërruar qytetin historik të Prizrenit, më të madhin jugor të Kosovës pranë kufirit me Shqipërinë, edhe në një kryeqytet filmi çdo verë.