Prokuroria do të thërrasë Berishën të dëshmojë për Shullazin

Prokuroria nuk ka vendosur ende se kur do ta thërrasë ish kryeministrin Sali Berisha për ta pyetur në cilësinë e personit që ka dijeni, në vijim të hetimeve që po zhvillon ndaj tre të ndaluarve, mes tyre edhe Emiljano Shullazi.

Duke qënë se për episodin e kanosjes për shkak të detyrës për të cilën është nën hetim Shullazi, regjistrimi i kësaj çështjeje është bërë pas deklaratës së Berishës, Prokuroria e Përgjithshme nuk e përjashton mundësinë që ta pyesë edhe ish kryeministrin.

Por ndërsa nuk është vendosur ende një datë se kur ai do të thirret për t’u pyetur, ajo që kërkojnë të sqarojnë prokurorët ka lidhje me hedhjen dritë mbi njerëzit që e kanë informuar Berishën për kërcënimin e profesor Mynyr Konit.

Ky veprim i prokurorise pritet të kryhet pas dëshmive të ish rektorit Dhori Kule dhe rektorit aktual Mynyr Koni.

Megjithëse ka dyshime se të dy ata janë kërcënuar për garën që po zhvillohej për rektoratin, ata nuk kanë dhënë asnjë detaj mbi identitetin e të dyshuarve, në mënyrë që të ndihmonin hetuesit. Të dy profesorët thanë një ditë më parë se nuk i kishin fiksuar njerëzit që i kërcënuan pasi ishin trembur. Ndërkohë prokuroria po kqyr edhe kamerat e sigurise të sekuestruara për këtë çështje.