Prokuroria, hetim KQZ-së. Sekuestrohen dosjet e vetëdeklarimit të dekriminalizimit

Oficerë të Policisë Gjyqësore janë nisur drejt Komisionit Qendror të Zgjedhjeve për të sekuestruar të gjitha dokumentacionet në lidhje me procedimin penal, të regjistruar 4 ditë më parë.

Më 16 shkurt 2017, Prokuroria e Tiranës regjistroi procedimin penal ndaj KQZ-së, duke e akuzuar për shkelje ligjore si për rastin e deputetit socialist Armando Prenga, ashtu dhe për dy kryetarë bashkie. Komisioni Qendror i Zgjedhjeve reagoi një ditë më parë në lidhje me akuzat dhe hetimin e nisur ndaj institucionit nga Prokuroria e Përgjithshme.

KQZ ishte akuzuar për shkelje të ligjit, duke pranuar deklarime jashtë afateve dhe për mosbashkëpunim, por zyrtarisht institucioni që ka rol kyç në dekriminalizim, sqaron se qëllimi i ligjit të dekriminalizimit është të sigurojnë besimin e publikut dhe jo inkriminimin e pakuptimtë.

KQZ tregon në rend kohor punën dhe emrat e kontrolluara prej saj. Në listën e funksionarëve që nuk prekeshin nga dekriminalizimi ishte edhe deputeti Shkëlqim Selami, për të cilin prokuroria gjeti prova shtesë që i rrëzonin atij mandatin.