Protestat anti-Putin, lideri i opozitës ruse dënohet me burg

Udhëheqësi i opozitës ruse, Alexei Navalny, u dënua me 30 ditë burgim pasi akuzohet për shkelje të vazhdueshme të ligjit mbi organizimin e tubimeve.

Ai u arrestua të hënën në shtëpinë e tij në Moskë, përpara se të niste një protestë anti-korrupsion.

Pavarësisht arrestimit të Navalny-t, mijëra mbështetës në gjithë Rusinë i janë përgjigjur thirrjes së tij për të protestuar kundër korrupsionit në qeverinë ruse.

Protestat kanë përfunduar me mbi 1 100 njerëz të ndaluar, kryesisht në Moskë dhe Shën Petersburg.

Navalny, i cili ka ndërmend të garojë për presidencën ruse vitin e ardhshëm, do të mbante një fjalim në mitingun, që sipas autoriteteve, ishte i paautorizuar.

Qindra persona u ndaluan gjithashtu në tubime të organizuara në mbarë vendin. OVD-Info, një OJQ e pavarur, deklaroi se 825 vetë ishin ndaluar nga policia vetëm në Moskë dhe qindra të tjerë në Shën Pietërburg.

Ministria e Brendshme ruse sqaroi se 5 mijë vetë morën pjesë në tubimin në Moskë dhe 3.500 në qytetin në veri-perëndim të Rusisë, ku 500 vetë u ndaluan.