Putin dhe Poroshenko arrijnë marrëveshje për gazin

Presidenti rus, Vladimir Putin deklaroi dje se kishte arritur një marrëveshje për furnizimin me gaz për Ukrainën gjatë muajve të dimrit me homologun e tij ukrainas, Petro Poroshenko duke i kërkuar Evropës të ndihmonte Kievin për të paguar faturën e burimeve energjetike që merrte nga Moska.

”Arritëm një marrëveshje gjatë takimit në Milano për rifillimin e pjesshëm të furnizimeve me gaz për Ukrainën, të paktën vetëm gjatë dimrit”, deklaroi Putin.

Pas takimit prej më pak se një ore me Poroshenkon, në kuadër të samitit të ASEM-it, i ndjekur edhe nga liderët e Bashkimit Evropian, presidenti rus u tha gazetarëve se ””Evropa duhet të ndihmojë Ukrainën të paguajë gazin rus”.

Pavarësisht deklaratave të Putinit, presidenti Poroshenko tha se ”nuk arritëm rezultate konkrete për çështjen e gazit”.

”Megjithatë, ka shpresa mbi mundësinë e gjetjes së një zgjidhjeje para takimit të 21 tetorit në Bruksel me përfaqësuesit e Komisionit Evropian”, deklaroi Poroshenko