Putini takon Witkoff në Shën Petersburg: e falënderon Trumpin dhe flet për rivendosjen e lidhjeve ekonomike, Witkoff sheh bazë për armëpushim

Presidenti rus Vladimir Putin u takua të mërkurën me të dërguarin e posaçëm amerikan Steve Witkoff për bisedime mbi përfundimin e luftës në Ukrainë, siç njofton Reuters duke iu referuar agjencive ruse të lajmeve. Takimi u zhvillua në Shën Petersburg, një ditë pas bisedimeve që Witkoff zhvilloi në Oslo me presidentin ukrainas Volodymyr Zelensky.

Sipas agjencive ruse, Putini i përcolli falënderimet e tij presidentit amerikan Donald Trump për përpjekjet për zgjidhjen e konfliktit dhe tha se Rusia është e interesuar të rivendosë lidhjet ekonomike me Shtetet e Bashkuara.

Witkoff, nga ana e tij, tha se ekziston bazë për një armëpushim dhe shprehu shpresën se Putini do të shqyrtojë rifillimin e bisedimeve trepalëshe mes Rusisë, Shteteve të Bashkuara dhe Ukrainës, sipas Interfax dhe TASS.

Në Oslo, pala ukrainase dhe partnerët evropianë i paraqitën Witkoff-it propozimet e tyre për një kornizë paqeje, përfshirë garancitë e sigurisë për Ukrainën, dhe i dërguari amerikan ia përcolli ato të mërkurën udhëheqjes ruse. Deri tani nuk është njoftuar ndonjë marrëveshje konkrete nga takimi i Shën Petersburgut.