Rama: Lajm i mirë për kë do Shqipërinë e punës e sipërmarrjes

Kryeministri Edi Rama e cilësoi sot lajm të mirë ngjitjen me 40 vende të Shqipërisë në klasifikimin e Bankës Botërore për kushtet e bërjes biznes.
“Lajm i mirë për kë do Shqipërinë e punës dhe sipërmarrjes: Ngjitemi 40 vende në klasifikimin e Bankës Botërore për kushtet e bërjes biznes!”, thekson kryeministri Rama në një postim në rrjetin social Facebook.

Raporti ‘Doing Business’ i Bankës Botërore, publikuar sot, e rendit Shqipërinë në vendin e 68-të në botë.
Ndërsa ministri i Ekonomisë, Tregtisë dhe Sipërmarrjes, Arben Ahmetaj, e konsideroi një lajm fantastik ngjitjen e Shqipërisë në klasifikimin për klimën e biznesit, referuar raportit të Bankës Botërore “Doing Business”.
“Sot e filluam ditën me një lajm fantastik për ekonominë shqiptare dhe klimën e biznesit në vend, të cilin dua ta ndaj edhe me ju. Raporti ‘Doing Business’ i Bankës Botërore, publikuar sot, e rendit Shqipërinë në vendin 68 në botë. Këto janë lajmet e mira që vazhdojnë të vijnë për ekonominë tonë. Modeli i ri ekonomik ka filluar të funksionojë!”, shkruan Ahmetaj në rrjetin social ‘Facebook’.