Rama në Berat: Duhet vazhduar projekti i madh që kemi nisur për këtë qytet

Kryeministri Edi Rama, gjatë prezantimit të kandidatit për kryebashkiak të Beratit, Petrit Sinaj, ka theksuar se ky qytet “ka qenë si një kështjellë e izoluar dhe ishte puna e Fadil Nasufit që ky qytet ka mbijetuar”.

“Jemi drejt përfundimit të rrugës që lidh Beratin me Lushnjën. Më në fund nuk do të ketë më gropa, por kemi ambicie më të madhe se kaq, e për këtë arsye, kemi një projekt për një rrugë turistike europiane për të ardhur në Berat, siç ka qenë një herë e një kohë”, tha Rama. Ai shtoi se për të vazhduar me projekte të tilla të mëdha, duhet votuar kandidati i koalicionit qeverisës.

“Nëse ka një vend që mund të jetojë me turizmin, ai është Berati. Brenda pak vitesh, Berati do të nxjerrë nga turizmi të ardhura të mjaftueshme sa për ta bërë Bashkinë e këtij qyteti një nga më të pasurat në vend”, theksoi Rama.

“Duhet të vazhdojë projekti i madh që ka nisur në këtë qytet dhe jo të mbahet gjallë Partia Demokratike, kandidati i së cilës nuk ka çfarë bën për Beratin. 21 Qershori është votë për qytetin”, deklaroi kreu i qeverisë.