Rama-opozitës: Reforma do të bëhet me ju ose pa ju, paguajmë çdo çmim

Kryeministri Edi Rama duke folur sot në sallën e Kuvendit ka falenderuar, “partneret ndërkomëbtarë të SHBA dhe BE për të gjithë ato përpjekje të jashtëzakonshme që kanë bërë për një vit e gjysëm për të krijuar kushte për një proces gjithpërshirës, ku në fakt të vetmit që nuk donin të ishin të përfshirë ishit ju.

Drafti tanimë ka hyrë drejt sallës së Kuvendit, tha Rama, duke shtuar se, “Kjo është vetëm ana simbolike e një suksesi të përbashkët ndërkohë që thelbi i suksesit do të ishte dhe do të jetë shembja e ngrehinës së kalbur të sistemit të sotëm të drejtësisë. Këtë sistem ne do ta shembim me ju ose pa ju. Nëse deri sot nuk jeni të bindur do ta shihni”.

“Jemi gati t’ju shtrijmë dorën. As që diskutohet që reforma me ju ose pa ju do bëhet me çmimin që do ketë. Jemi gati të paguajmë çdo çmim. Sepse sado i lartë të jetë çmimi është më e lartë kostoja mbajtjes në këmbë të këtij sistemi horrlëku. Një sistem ku njerëzit e thjeshtë ose duhet ta blejnë drejtësinë ose duhet ta shohin të ikur nga duart”, tha Rama.

Shpresoj, tha Rama, “se koha e mbetur deri kur drafti të vijë për votim t’ju vetëdijësojë që çmimin ta bëjmë të përballueshëm dhe reformën ta bëjmë sëbashku”.

Duke iu drejtuar deputetëve të opozitës, Rama tha se, “ju pashë dje në një përpjekje të dëshpëruar që mundoheshit të provonit me e-maile pune në bashkëpunim me partnerët, se ju keni të drejtë dhe flisni për ca data të fillimit të vitit dhe ca propozime në fillim të vitit. Ju erdhët në Komision përpara shumë pak javësh për vendet e rezervuara. Erdhët për t’i thënë jo draftit të reformës dhe vutë në tavolinë një draft tërësisht të njëanshëm tërësisht të ri dhe tuajin. E kupton Jozefinë sa qesharakë janë ata që sot udhëheqin dhe administrojnë PD-në”.