Rangnick zgjedh Austrinë, refuzon kuqezinjtë që nuk i garantuan autonomi vendimmarrjeje

Pas një periudhe të gjatë negociatash dhe pasigurish, Ralf Rangnick ka marrë vendimin e tij. Sipas “Gazzetta dello Sport”, strategu gjerman ka refuzuar ofertën e Milanit, që e dëshironte në rolin e drejtorit teknik, duke zgjedhur të vazhdojë si trajner i kombëtares së Austrisë.

Nga SHBA vjen informacioni se ish-drejtuesi i Salzburgut është vënë përballë një vendimi nga Federata Austriake e Futbollit. ÖFB i kishte propozuar prej kohësh rinovim kontrate deri në vitin 2028 me pagë pothuajse të dyfishuar dhe i kërkoi të qartësonte të ardhmen e tij përpara nisjes së Botërorit. Kështu, 5 ditë para debutimit ndaj Jordanisë, erdhi refuzimi përfundimtar ndaj projektit të Milanit.

Rangnick ishte figura që pritej të merrte kontrollin e plotë të sektorit sportiv të kuqezinjve. Për të pranuar ofertën e Milanit, ai kishte kërkuar autonomi të plotë vendimmarrëse: nga zgjedhja e trajnerit dhe lojtarëve, deri te bashkëpunëtorët, skautët dhe drejtuesit e akademisë. Këto kërkesa krijuan dyshime te Gerry Cardinale dhe Zlatan Ibrahimović, duke bërë që bisedimet të zvarriteshin.

Pas javësh pritjeje, Rangnick vendosi të mos presë më. Austria i garanton liri të plotë veprimi dhe e ka bërë të ndihet më i vlerësuar, ndaj, përveç ndonjë surprize të madhe, ai do të mbetet në krye të përfaqësueses austriake edhe pas Botërorit.

Tani Milani duhet të orientohet drejt një alternative tjetër. Një nga kandidatët kryesorë mund të jetë Ramon Planes, i cili së fundmi është larguar nga Al Ittihad dhe kishte qenë në garë me Rangnick për postin e drejtorit teknik kuqezi.