Raportimi i KLSH, Leskaj: Në 2016 do auditojmë koncesionarët
Në mbledhjen e radhës së Komisionit të Ekonomisë, Kryetari i KLSH-së ka raportuar lidhur me aktivitetin e institucionit që drejton gjatë vitit të shkuar. Sipas z. Leskaj, në 2015 janë rritur auditimet me 8.8% dhe projeksionet për këtë vit janë në nivelin e 15 %.
“Në vitin 2015 kemi kryer 158 auditime të performancës ose në nivelin 8.8%. Në këtë vit synojmë që auditimet të rriten në nivelin e 15%”- tha z. Leskaj.
Duke vijuar raportimin, Leskaj deklaroi se këtë vit do të auditojmë specifikisht marrëveshjet koncesionare.
Raporti konstaton se për vitin 2015, dëmi ekonomik i shkaktuar nga parregullsitë është 919 mln euro, pjesa më e madhe e të cilit vjen kryesisht nga fusha e menaxhimit të pasurisë shtetërore, ku rezulton se është konstatuar rreth 84% e dëmit total në sektorin e energjisë dhe sektorin e hidrokarbureve.
Sipas raportit të KLSH, verifikimi i të njëjtit trend lidhur me dëmin në sektorin energjetik, tregon se ky mbetet nje sektor me risk, që adreson domosdoshmërinë e një vëmendje të madhe mbi këto fusha nevralgjike të ekonomisë.
Dëmi ekonomik, sipas fushave, i konstatuar në 2015 rezulton, në sektorin e tatim-taksave, në vlerën e përgjithshme prej 92 milionë euro; në sektorin e doganave, në vlerën e 31 milion eurove, në fushën e prokurimeve 19 milion euro, etj.
Në auditimet e realizuara gjatë vitit 2015, KLSH ka rekomanduar përmirësime ligjore, kryesisht të lidhura me zbatimin e buxhetit, por dhe ndërhyrje të rëndësishme sidomos në sektorë nevralgjik për vendin.
“ I sugjeroj qeverisë hartimin e ligjit për përgjegjësinë materiale, ku autoritetet dhe institucionet të mbajnë përgjegjësi. Reformës në drejtësi i uroj suksese por kjo reformë duhet të vijojë në këtë drejtim: për mbajtjen dhe mos mbajtjen e përgjegjësive të dëmit/abuzimit”- ka bërë sugjerimin e fundit z. Leskaj.
