Reforma territoriale, PBDNJ kundër hartës së miratuar në Komision
PBDNJ e quan të papranueshme variantin final të hartës së reformës administrativo-territoriale të Shqipërisë që u miratua dje në Komisionin parlamentar dhe deklarohet hapur se nuk do ta votojë.
Kreu i PBDNJ-së dhe njëkohësisht nën/kryetar i Kuvendit, Vangjel Dule, tha ne nje konference shtypi se me ndarjen e re po tentohet të shkelen të drejta themelore dhe po trazohen me qëllime të mbrapshta historike.
Dule i bëri thirrje Kryeminsitrit Rama të mos privojë këtë reformë nga standardet dhe fryma europiane.
“Nga të dhënat e deritanishme reforma orientohet në devijime substanciale nga këto parime dhe standarde në shkelje flagrante të të drejtave themelore. Ndërkohë, nën ankthin e garantimit të aritmetikës së cilësuar parlamentare që kërkohet nga një ligjëvënie e tillë, kësaj reforme i faturohen së fundmi edhe elemente të spitakura klienteliste dhe elektorale”, u shpreh Dule.
Sipas tij, Himara është rasti më i spikatur. “Me ndarjen e re po tentohet të shkelen të drejta themelore dhe po trazohen me qëllime të mbrapshta historike dhe të krijohen probleme aty ku nuk ka. Nëse ky do të jetë produkti përfundimtar do të jetë e pavotueshme dhe e papranueshme”, tha Dule.
