Regjistrimi i celularëve, PD ankimon vendimin e qeverisë në Gjykatën Kushtetuese

Halimi: Rama, vendim ligjor e antieuropian. Të pezullohet e të shfuqizohet

PagesaQeveria në vendimin e marrë më 4 qershor kërkon që

Ministria e Financave të regjistrojë të gjithë numrat e IMEI të celularëve. Zotëruesi i aparatit paguan një tarifë shërbimi për regjistrim prej 500 lekësh

IMEI – Numri IMEI (The International Mobile Station Equipment Identity) është numri unik 15-shifror, që shërben për të identifikuar aparatet celulare. Ky numër zakonisht, gjendet i shtypur në çdo kuti paketuese si dhe në brendësi të aparatit, poshtë vendit ku vendoset bateria ose gjenerohet automatikisht (*#06#).

BLEDAR HOTI

Partia Demokratike i kërkon Gjykatës Kushtetuese pezullimin e vendimit të qeverisë “Rama”, i marrë më 4 qershor të këtij viti, për “Ngritjen e bazës së të dhënave IMEI dhe regjistrimin e numrave IMEI të aparateve celulare, që përdoren në rrjetet e shërbimeve të komunikimeve të lëvizshme”. Lajmi për ankimin në Gjykatën Kushtetuese u bë i ditur nga deputeti i Partisë Demokratike, Eduard Halimi, i cili argumentohet me faktin se shkel të drejtën e privatësisë së individit. “Dorëzuam në Gjykatën Kushtetuese padinë ndaj Kryeministrit Rama që ka urdhëruar të gjithë kompanitë t’i dorëzojnë IMEI-n e çdo abonenti në Shqipëri. Disponimi i numrit IMEI siguron akses të pakufizuar lidhur me vendndodhjen e individit, SMS, bisedat dhe thirrjet telefonike, Viber, Facebook, WhatsApp, BBM, numër telefoni të regjistruar, foto, pra gjithçka private në aparatin celular të një individi. Urdhri i Ramës për të përgjuar komunikimet elektronike dhe korrespodencën personale të gjithkujt, është antieuropian dhe shkon në drejtim të vendeve me tendenca oligarkike, ku çdo gjë private, përfshirë edhe të dhënat rreth personit, konsiderohen shtetërore dhe mund të përdoren pa kurrfarë kufizimi”, shprehet Halimi. Më tej, ish-ministri i Drejtësisë, Halimi, e cilëson urdhrin e qeverisë si antikushtetues, “pasi cenimi i së drejtës për jetë private dhe së drejtës për mbrojtjen e të dhënave personale, jashtë çdo standardi kushtetues për kufizimin e të drejtave të njeriut, cenon nenet 4, 17, 35, 36 dhe 118 të Kushtetutës, nenin 8 të KEDNJ-së, si dhe jurisprudencën e konsoliduar të Gjykatës Kushtetuese, Gjykatës Europiane për të Drejtat e Njeriut dhe Gjykatës Euuropiane të Drejtësisë. Ky urdhër do të duhej të pezullohej sa më parë nga Gjykata në mënyrë që të mos sjellë pasoja të pariparueshme për funksionimin normal të shtetit të së drejtës si dhe të drejtave dhe lirive themelore të individëve”.

Kërkesa

Në ankimin e paraqitur nga 1/5 e deputetëve, deputetët e opozitës i kanë parashtruar dy kërkesa Gjykatës: “1) Deklarimi i papajtueshmërisë me Kushtetutën i vendimit nr. 354, datë 4.6.2014 të Këshillit të Ministrave ‘Për ngritjen e bazës së të dhënave IMEI dhe regjistrimin e numrave IMEI të aparateve celulare, që përdoren në rrjetet e shërbimeve të komunikimeve të lëvizshme’;

2) Pezullimin e vendimit nr. 354, datë 4.6.2014 të Këshillit të Ministrave, ‘Për ngritjen e bazës së të dhënave IMEI dhe regjistrimin e numrave IMEI të aparateve celulare, që përdoren në rrjetet e shërbimeve të komunikimeve të lëvizshme’. Ndër argumentet e tjera theksohet se “Detyrimi që u vendoset operatorëve të komunikimit elektronik, me vendim të Këshillit të Ministrave, për të dorëzuar pranë Ministrisë së Financave të dhëna personale të klientëve të tyre (numrin IMEI) është antikushtetues edhe për shkak se transferimi i të dhënave bëhet pa pëlqimin e subjektit deklarues, gjë që bie ndesh me nenin 35

të Kushtetutës. Një kufizim i tillë i vendosur me vendim të Këshillit të Ministrave nuk është në përputhje dhe bazohet në nenin 35, paragrafi i dytë i Kushtetutës (parashikohet në ligj), në nenin 17, paragrafi i dytë i Kushtetutës (nuk e cenon thelbin e së drejtës për privatësi dhe nuk i tejkalon kufizimet e

parashikuara në KEDrNj) si dhe nenin 8, paragrafi i dytë i KEDrNj (kufizimi synon mirëqenien ekonomike të vendit, parandalimin e veprave penale, mbrojtjen e të drejtave dhe lirive të të tjerëve”. Qeveria në vendimin e marrë më 4 qershor kërkon që

Ministria e Financave të regjistrojë të gjitha numrat e IMEI të celularëve. Zotëruesi i aparatit paguan një tarifë shërbimi për regjistrim prej 500 lekësh pranë operatorit të telefonisë celulare, i cili i transferon këto të ardhura në llogari të Ministrisë së Financave. Sipas VKM-së, procesi i plotësimit të Bazës së të Dhënave me numrat IMEI, të cilët nuk janë në sistemin e të dhënave të kompanive të telefonisë celulare, në zbatim të dispozitave të këtij vendimi, zgjat 90 ditë, pas datës së shpalljes së njoftimit të Ministrisë së Financave për ngritjen e Bazës së të Dhënave.