Riatdhesohen mbetjet mortore nga Rashka, Serbi

Në Merdare, personeli i EULEX-it që punon në kuadër të Departamentit të Mjekësisë Ligjore të Kosovës, sot do t’i pranojë nga autoritetet e Serbisë një numër të mbetjeve mortore të zhvarrosura gjatë gërmimeve të fundit në Rashkë. Po ashtu, me këtë rast do të pranohen edhe materiale dëshmuese dhe dokumente tjera.

EULEX njofton se këto mbetje mortore do të dërgohen në selinë e DML në Prishtinë, ku do të kryhet procesi i identifikimit.

“Përveç punës identifikuese, një numër i pjesëve duhet të ri-bashkohen me disa prej mbetjeve mortore. Pasi të ketë përfunduar tërë kjo punë, mbetjet mortore do t’u dorëzohen familjeve me ndihmën e Komisionit për Personat e Pagjetur të Kosovës”, thuhet në njoftim.

Deri më tani, DML i ka kryer 456 operacione në terren, gjatë të cilave mbetjet mortore të 413 personave u janë dorëzuar familjeve të tyre.

“Prej tyre, 315 ndodheshin në listën e personave të pagjetur”, përfundohet në njoftimin e EULEX.