Rinovimi i konvikteve me efiçencë energjie: Gjermania jep grant 4,5 milionë euro

Gjemania mbështet Shqipërinë në rinovimin e konvikteve të Qytetit Studenti Tiranë, sipas parimit tëefiçencës së energjisë.

Marrëveshja prej 4,5 milionë eurosh është nënshkruar të enjten në Tiranë nga ambasadori i Gjermanisë në vendin tonë, Hellmut Hoffmann dhe ministri i Energjisë dhe Industrisë, Damian Gjiknuri.

Financimi i këtij projekti në formë granti vijoi pas premtimit të Kancelares Federale Angela Merkel gjatë vizitës së saj në Tiranë më 8 korrik 2015.

Gjermania do të ndajë me Shqipërinë përmes Bankës për Zhvillim KfW përvojën e saj të pasur në rinovimin e ndërtesave sipas parimit të efiçencës së energjisë.

Si pasojë e këtij projekti, konsumi i energjisë do të reduktohet ndjeshëm, duke ngarkuar kështu më pak buxhetin e shtetit dhe njëkohësisht duke mbrojtur klimën.

Krahas kësaj, shumë studentë do të përfitojnë nga mundësi qenësisht më të mira të banimit dhe studimit. Një ekspert i Bankës KfW ka nisur që tani inspektimin e pesë konvikteve për këtë qëllim.