Rizvanolli: Mbi 200 mijë familje përfituan nga pakoja 75 milionë euro e BE-së për energjinë

Mbi 200 mijë familje në Kosovë kanë përfituar nga pakoja e mbështetjes për energjinë e Bashkimit Evropian, në vlerë totale prej 75 milionë eurosh. Kështu bëri të ditur ministrja e Ekonomisë, Artane Rizvanolli, në aktivitetin për shënimin e përfundimit të programit të mbështetjes për energjinë, siç njofton Kosova Times.

Rizvanolli falënderoi Bashkimin Evropian për mbështetjen e dhënë në një periudhë të vështirë të krizës energjetike, e cila, sipas saj, ndihmoi familjet të përballonin kostot e energjisë dhe krijoi mundësi për kursime afatgjata. Ajo rikujtoi se kriza energjetike e vitit 2022, e përkeqësuar nga agresioni rus kundër Ukrainës, e vuri Evropën përballë sfidave të mëdha të sigurisë së furnizimit, ndërsa për Kosovën situata ishte veçanërisht e vështirë për shkak të kapaciteteve të vjetra prodhuese dhe rritjes së shpejtë të konsumit të energjisë elektrike.

Sipas të dhënave të prezantuara në aktivitet, vetëm gjatë dimrit 2024–2025 rreth 85 mijë familje u mbështetën përmes programit për konsumatorët e cenueshëm, ndërsa mbi 20 mijë familje që përfitojnë nga asistenca sociale morën mbështetje për blerjen e lëndës djegëse për ngrohje. Ndërkaq, përmes Fondit të Kosovës për Efiçiencë të Energjisë janë zbatuar masa në sektorin rezidencial në vlerë prej 20 milionë eurosh, që synojnë përmirësimin e kushteve të banimit, uljen e konsumit dhe lehtësimin e faturave për familjet përfituese. “Ne kemi mbështetur familjet për ta përballuar dimrin e kemi investuar për shumë dimra të tjerë që vijnë”, u shpreh Rizvanolli.

Ambasadori i BE-së në Kosovë, Dirk Schuebel, deklaroi se Bashkimi Evropian ka investuar mbi 3.7 miliardë euro në Kosovë që nga viti 1999, ndërsa pakoja energjetike ka ndihmuar qindra mijëra qytetarë dhe biznese. Sipas tij, përtej mbështetjes së drejtpërdrejtë për më shumë se 200 mijë familje, programi ka kontribuar edhe në rritjen e efiçiencës së energjisë në dhjetëra mijëra shtëpi dhe në mbi 150 biznese, duke ulur kostot dhe duke përmirësuar kushtet e jetesës dhe të punës. Ai e vlerësoi pakon jo vetëm si reagim ndaj krizës, por edhe si investim në sigurinë afatgjatë energjetike të Kosovës dhe në tranzicionin drejt energjisë së pastër.

Të dyja palët shprehën gatishmëri për vazhdimin e bashkëpunimit ndërmjet Bashkimit Evropian dhe institucioneve të Kosovës, në mënyrë që mbështetja të përkthehet në përfitime konkrete për qytetarët, familjet dhe bizneset, si dhe për avancimin e energjisë së ripërtëritshme dhe garantimin e sigurisë energjetike në të ardhmen.