Rriten tensionet Tiranë-Athinë, reagon ashpër Ministria e Jashtme greke

Një ditë pas reagimit të ministrisë së Punëve të Jashtme të Shqipërisë, pas deklaratës së Athinës zyrtare, ku kërcënonte Shqipërinë me bllokim të procesit të integrimit në BE, për konliktin e banesave në Himarë është përgjigjur sërish Greqia.

Në një deklaratë zyrtare të Ministrisë së Jashtme greke akuzon vendin tonë se nuk po zbaton me të njëjtat standarde të drejtat e pakicave në gjithë territorin e Shqipërisë.

“Zyrtarët shqiptarë nuk mund të pretendojnë urbi et orbi” se të drejtat e minoritetit grek respektohen në të gjithë vendin, në të njëjtën kohë që ata i shkelin ato në praktikë, duke minuar ecurinë europiane të vendit të tyre. Faktet flasin vetë, njoftimet për prishjen e ndërtesave, si pjesë e projektit rizhvillimor të Himarës janë dërguar për njerëzit të cilët janë të gjithë me origjinë greke. Bëhet fjalë për një veprim që të çon në përfundimin se ka një plan për shkeljen e të drejtave të minoritetit grek. Deklaratat e djeshme të zyrtarëve shqiptarë të çojnë në përfundime logjike të cilat bien në kundërshtim me kodet aktuale të mbrojtjes së të drejtave të minoriteteve, që janë në fuqi njëkohësisht në gjithë vendet demokratike e europiane. Udhëheqja shqiptare ka një konceptim të rremë të historisë, duke e ngatërruar me angazhimet e Shqiperisë, të cilat rrjedhin nga e Drejta Ndërkombëtare dhe ajo Europiane, për mbrojtjen e minoritetit grek, i cili është autoktonë dhe me të drejta legjitime”­,  thuhet në deklaratë.