Rrjet droge nëpër shkolla! Arrestohen 20 shpërndarës, shpallen në kërkim 4 persona

Të rinj të veshur sport, me makina modeste dhe pa asnjë bujë 24 persona  mes tyre 2 vajza prej shumë kohësh  shpërndanin drogëra të të gjitha llojeve në kryeqytet. Tregun e shitjes ata e kishin siguruar pranë lokaleve të natës dhe shkollave të ndryshme në Tiranë dhe Kamëz.

Falë hetimeve të nisura që në janar të këtij viti policia arriti të provojë se shpërndarësit  në bashkëpunim me njëri-tjetrin vepronin të ndarë në disa grupe dhe shpërndanin lëndë narkotike në zona si Ali Demi, rruga Bardhyl, Oxhaku, zona e Bllokut dhe shkolla Petro Nini, Stacioni i Trenit, Ish-parku, Lapraka etj.

24 shpërndarësit ishin angazhuar për të mos u identifikuar nga policia. Shpërndarjen e drogës ata e kryenin duke lëvizur me transport publik ndërsa për drogra të ndryshme përdornin kode. Kur flisnin për kokainën ata I referoheshin si pluhuri I zanave.

Gjatë operacionit u sekuestruan në cilësinë e provës materiale  më shumë se 2 kilogramë  kokainë, 300 doza kanabis, 130 doza heroinë, shuma parash dhe 29  aparate celulare.

Të arrestuarit janë: Fabian Qoku,Redi Lolaj, Eduard Hysa, Dorjano Çela, Enver Mehmeti, Fatbardh Bardhi, Martin Kuka, Marsel Gjona, Mariglen Hoxha, Muharrem Tarushi, Polikron Shabani, Erion Xhaxho, Altin Llani dhe Jurgen Hasamataj.

Ata vepronin si dy grupe kriminale të përfshirë në veprimtarinë kriminale të shpërndarjes së heroinës, kokainës dhe kanabisit në zona të ndryshme të Tiranës, kryesisht në lokale nate si dhe në ambiente pranë shkollave.

Gjatë operacionit u sekuestruan 2 kilogramë e 120 gramë kokainë, 300 doza kanabis, 130 doza heroinë, shuma parash rreth 5 mln lekë të vjetra, 1700 euro, 11 automjete si dhe 29 aparate celulare.

Pas arrestimit të shpërndarësve policia është orientuar drejt identifikimit të furnizuesve të tyre. Pritet zbërthimi i celularëve të të arrestuarve për të shkuar në emra konkret por paraprakisht ka dyshime se ata janë nga Fush Kruja.