Rubio në Athinë të hënën: udhëheq dialogun strategjik SHBA–Greqi për mbrojtjen dhe energjinë

Sekretari amerikan i Shtetit, Marco Rubio, do të vizitojë Greqinë javën e ardhshme, siç njofton Reuters bazuar në deklaratën zyrtare të Departamentit të Shtetit, publikuar të enjten. Vizita është pjesë e një turneu tripalësh që do ta çojë shefin e diplomacisë amerikane në Islandë, Greqi dhe Portugali më 5–8 tetor, për të diskutuar bashkëpunimin ekonomik dhe të sigurisë, sipas njoftimit.

Në Athinë, Rubio do të udhëheqë delegacionin amerikan në sesionin e gjashtë të Dialogut Strategjik SHBA–Greqi, forumin diplomatik të nivelit të lartë që synon thellimin e bashkëpunimit në fushën e mbrojtjes, energjisë, sigurisë rajonale dhe çështjeve të tjera, raporton agjencia Reuters.

Turneu nis në Rejkjavik, ku Rubio do të bisedojë me zyrtarët islandezë për «bashkëpunimin ekonomik dhe të sigurisë», ndërsa pas Athinës do të udhëtojë për në Lisbonë për bisedime me zyrtarët portugezë për «avancimin e bashkëpunimit në mbrojtje, ekonomi dhe teknologji», sipas deklaratës së Departamentit të Shtetit.

Dialogu strategjik SHBA–Greqi është forumi kryesor përmes të cilit dy vendet koordinojnë axhendën e mbrojtjes, energjisë dhe sigurisë rajonale — tema që kanë fituar peshë të veçantë muajt e fundit, mes tensioneve në Mesdheun lindor dhe krizës energjetike që po prek gjithë Europën.

Vizita e Rubios vjen vetëm pak ditë pasi Greqia mori presidencën e rradhës së Këshillit të Sigurimit të OKB-së, duke e vendosur Athinën në qendër të vëmendjes diplomatike ndërkombëtare në këtë fillim tetori.