Rubla thyen një tjetër rekord dobësie përballë dollarit dhe euros
Rubla ruse vazhdoi sot rënien e saj të pandalur, duke thyer një rekord të ri dobësie përballë dollarit dhe euros, e goditur nga ulja e çmimit të naftës dhe nga sanksionet ekonomike të vendosura nga Perëndimorët ndaj Rusisë.
Këmbimi valutor i monedhës ruse sot u regjistrua në 64,5 rubla për një euro dhe 51,84 rubla për një dollar.
Monedha ruse, që rifilloi rënien e saj në fund të tetorit, humbi më shumë se një të tretën e vlerës në një vit, e tërhequr gjithnjë e më poshtë nga sanksionet ekonomike të dekretuara nga Perëndimorët për shkak të rolit të Moskës në krizën ukrainase dhe nga rënia e çmimit të naftës, ku shteti rus nxjerr një të tretën e të ardhurave të veta.
Vendimi i marrë nga Organizata e Vendeve Eksportuese të Naftës (OPEC) që të mbajnë nivelin e prodhimit në 30 milionë fuçi në ditë për gjashtë muajt e ardhshëm rifilloi rënien e rublës.
Autoritetet ruse rinë të qeta dhe japin garanci, presidenti Vladimir Putin theksoi se “nuk sheh asgjë të veçante në vendimin e OPEC-ut”.
“Dimri po afron, dhe jam i sigurt se në tremujorin e parë, afër mesit të vitit, tregu do të riekuilibrohet.”, garantoi ai.
Ndërsa Banka Qendrore Ruse, që kishte vendosur në fund të nëntorit që të lërë rublën të lundrojë e lirë, njoftoi të premten se është gati të rifillojë nëse është e nevojshme ndërhyrje të rregullta me qëllim reduktimin e zhvlerësimit të monedhës.
Për momentin, sipas një sondazhi të publikuar nga qendra e pavarur “Levada”, popullsia ruse po fillon të shqetësohet nga degradimi i ekonomisë ruse, horizonti i së cilës duket i vrenjtur me një rritje ekonomike afër zeros në fillim të vitit 2015 sipas Bankës Qendrore.
Një e katërta e rusëve të pyetur shprehen të shqetësuar nga rënia e çmimit të naftës ndërkohë që 80 për qind e Rusisë shqetësohet nga inflacioni, që tejkaloi tetë për qind për shkak të dobësimit të rublës dhe të embargos të vendosur nga Moska në shumicën e prodhimeve ushqimore perëndimore si përgjigje ndaj sanksioneve të vëna nga Perëndimorët për çështjen ukrainase.
