Rusia: dronët ukrainas goditën dy objekte në centralin bërthamor të Zaporizhzhias; një shofer u vra

Dronët ukrainas goditën gjatë natës dy objekte të centralit bërthamor të Zaporizhzhias, që mbahet nga Rusia, njoftoi të hënën shefi i korporatës shtetërore bërthamore Rosatom, duke thënë se nuk ka kërcënim për sigurinë bërthamore, siç njofton Reuters.

Alexei Likhachev, drejtor i përgjithshëm i Rosatomit, tha se një laborator dhe një impiant për përpunimin e mbetjeve radioaktive ishin objektivat e sulmit; një shofer që sillte ushqim për punonjësit e centralit u vra në sulm. Ukraina nuk ka komentuar incidentin.

Të shtunën, menaxhmenti i centralit tha se bombardimet ukrainase të javëve të fundit kishin dëmtuar pajisjet e furnizimit me energji elektrike të jashtme — energjia po sigurohet tani nga gjeneratorët dizel emergjencë.

Centrali nuk prodhon energji elektrike, por ka nevojë për furnizim të jashtëm nga dy lidhje për ta mbajtur të ftohtë karburantin bërthamor. Rusia e mori centralin, më i madhi në Europë me gjashtë reaktorë, në javët e para të pushtimit të shkurtit 2022.

Moska dhe Kievi e kanë akuzuar rregullisht njëra-tjetrën për veprime ushtarake që rrezikojnë sigurinë bërthamore. Agjencia Ndërkombëtare e Energjisë Atomike (IAEA), mbikëqyrësja bërthamore e OKB-së, është përpjekur vazhdimisht të sigurojë një armëpushim rreth centralit për riparimin e linjave të rrjetit kryesor; monitorë të OKB-së janë të vendosur në centralin e Zaporizhzhias dhe në tre centrale të tjera që operojnë në Ukrainë.

Zëdhënësja e Ministrisë së Jashtme ruse, Maria Zakharova, akuzoi Perëndimin se po u mundëson sulmet ukrainase duke mos i dënuar publikisht.