Samaras krahason SYRIZA-n me ”Agimin e artë”

Një sulm frontal kundër SYRIZA-s ka ndërmarrë kryeministri grek, Antonis Samaras duke folur në konferencën e organizuar nga revista britanike ”The Economist” në Athinë. Samaras e ka akuzuar partinë më të madhe të opozitës se po ecën ”krah për krah me ‘Agimin e Artë”. ”Tani, që Greqia po përpiqet të fitojë terrenin e humbur edhe në këtë fushë, disa po përpiqen ta evitojnë. Ta pengojnë. Ta anulojnë… Dhe nuk ngurrojnë të përdorin madje edhe deputetët e ‘Agimit të Artë’, ndërsa nuk kanë asnjë shans që të arrijnë diçka. Kaq verbëri, kaq imoralitet. Admirojini gjoja demokratët, krah për krah me ‘Agimin e Artë”, deklaroi Samaras. Kryeministri iu referua edhe privatizimit të korporatës së elektrikut duke i dhënë përgjigje pozicionimit të liderit të SYRIZA-s Aleksis Cipras në të njëjtën konferencë. ”Greqia ka detyrimin që të liberalizojë tregun e energjisë, ashtu siç çdo shtet anëtar i BE-së. Të gjitha vendet e bëjnë. Dhe të gjitha kanë dobi nga kjo. Për të hequr monopolin shtetëror dhe për të shfuqizuar pozitën superiore aty ku ekziston. Sepse duhet të bëhen investime të mëdha në impiante prodhimi dhe infrastrukturë, që sjellin çmime më të ulëta dhe shërbime më të mira”, shtoi ai. Kryeministri theksoi se sakrificat e mëdha të popullit grek nuk u bënë që vendi të kthehet mbrapa. ”Nuk i arritëm gjithë këto me kaq mund që të kthehemi sërish aty ku ishim më parë. Nuk po dalim nga kriza që të rrëshqasim mbrapa. E them qartë, nuk e kemi garantuar krejtësisht. Do t’i garantojmë kur të futemi për së mbari në rrugën e zhvillimit”, tha Samaras… Nuk do të lejojmë kurrë që vendi të gjendet serish në kaosin ku ndodhej. Dhe atë që kaluam nuk do të lejojmë kurrë ta kalojmë sërish”, theksoi ai.