Sekuestrohen gurë të çmuar në Doganën e Durrësit, dyshohen diamante

Një operacion i përbashkët sot në 10 qershor mes Doganës së Durrësit dhe Policisë së Shtetit ka çuar në zbulimin dhe sekuestrimin e disa sendeve të dyshuara me vlerë të lartë në Portin e Durrësit.

Gjatë kontrolleve të ushtruara në automjete të mbërritura nga Italia, autoritetet kanë gjetur katër gurë të çmuar, që dyshohet se janë diamante. Po ashtu, është sekuestruar një aparaturë elektronike e përdorur për detektimin e metaleve të çmuara.

Sipas njoftimit zyrtar, pajisja u zbulua në një valixhe brenda një automjeti që kishte mbërritur me tragetin e linjës Ankona–Durrës.

Ndërkohë, kontrollet zbuluan edhe një sasi të dyshuar kokaine të fshehur në kabinën e drejtuesit të një automjeti tjetër. Të gjitha materialet e sekuestruara janë marrë në administrim nga autoritetet përkatëse për verifikime të mëtejshme. Rastet janë referuar pranë strukturave kompetente.

Njoftimi i policisë:

Dogana Durrës, në bashkëpunim me strukturat e Policisë së Shtetit, bllokuan ditën e sotme gjatë disa kontrolleve të kryera në Portin e Durrësit një sasi lënde narkotike të dyshuar si kokainë, katër gurë të çmuar të dyshuar si diamante, si dhe një aparaturë elektronike për detektimin e metaleve të çmuara.

Gjatë kontrollit të një automjeti të mbërritur me tragetin e linjës Ankona–Durrës, u konstatua një valixhe që përmbante aparaturën detektuese dhe disa aksesorë të montueshëm.

Gjatë kontrollit fizik të një shtetasi që udhëtonte me një tjetër automjet të ardhur nga Italia, u gjetën katër paketime transparente që përmbanin gurë të ngjashëm me diamantet.

Në një automjet tjetër u zbulua një sasi e dyshuar lënde narkotike, kokainë, e fshehur në një veshje të vendosur në kabinën e drejtuesit të mjetit.

Rastet iu referuan strukturave kompetente për veprime të mëtejshme procedurale dhe hetimore.

/tvklan.al