SHBA kërkon shkëmbimin e deri në 17 milionë fuçive naftë nga rezerva strategjike

Shtetet e Bashkuara kanë hapur një kërkesë për propozime për shkëmbimin e deri në 17 milionë fuçive naftë bruto nga Rezerva Strategjike e Naftës, njoftoi të premten Departamenti amerikan i Energjisë, siç njofton Reuters. Kompanitë që marrin naftën tani do të duhet ta kthejnë atë më vonë, së bashku me fuçi shtesë si premium.

Shkëmbimi është pjesë e marrëveshjes globale të arritur në mars, kur Uashingtoni ra dakord të huazojë 172 milionë fuçi nga rezerva, brenda një pakete të Agjencisë Ndërkombëtare të Energjisë me rreth 30 vende për lirimin e gjithsej 400 milionë fuçive. Qëllimi ishte frenimi i çmimeve të karburanteve, të rritura ndjeshëm pasi lufta SHBA-Izrael ndaj Iranit dhe bllokimi i Ngushticës së Hormuzit tronditën furnizimet globale.

Kjo nuk është përpjekja e parë: oferta e fundit nga marrëveshja e marsit, e hapur në qershor, tërhoqi vetëm rreth 500,000 fuçi huazime. Sipas raportimit, kompanitë ngurruan për shkak të kushteve, që kërkonin kthimin e naftës me premium deri në 24 për qind në formë fuçish shtesë.

Lëvizja e re vjen ndërsa çmimet mbeten të larta: nafta Brent u tregtua të premten rreth 105.75 dollarë për fuçi. Administrata amerikane po përpiqet të mbajë nën kontroll çmimet e karburanteve, të cilat janë kthyer në një çështje qendrore politike përpara zgjedhjeve afatmesme të 3 nëntorit në SHBA.