“Shërbimi i Provës” rregullohet me ligj

Organizimi dhe funksionimi i Shërbimit të Provës do të rregullohet tashmë me një ligj të posaçëm i hartuar nga ministria e Drejtësisë dhe i përcjellë së fundi për miratim në Kuvend.
Veprimtaria e këtij Shërbimi, që kryhet në interes të komunitetit, ka qëllim rehabilitimin shoqëror të shkelësve të ligjit, uljen e rrezikut të përsëritjes së veprave penale dhe rritjen e sigurisë shoqërore. Aplikimi i masave alternative të dënimit me burgim, që realizohet përmes Shërbimit të Provës, synon uljen e kostove sociale të dënimeve penale dhe ruajtjen e sigurisë shoqërore.

Deri më sot, zbatimi i masave alternative në vendin tonë realizohej përmes një institucioni të posaçëm të ngritur për këtë qëllim nga viti 2009, në saje të ndryshimeve të Kodit Penal dhe ligjit “Për ekzekutimin e dënimeve penale”. Institucioni i Shërbimit të Provës e zhvillonte veprimtarinë e tij bazuar në një vendim të Këshillit të Ministrave, por një rekomandim i Këshillit të Evropës sugjeron që “autoriteti përgjegjës për zbatimin e masave dhe sanksioneve komunitare duhet të rregullohet me ligj”.

Ndaj në përmbushje të këtij detyrimi, që nga fillimi i tij, funksionimi dhe organizimi i Shërbimit të Provës duhet të ishte rregulluar me ligj. Projektligji i propozuar jo vetëm bën një rregullim ligjor të aktivitetit të deritanishëm të Shërbimit të Provës, por synon të përcaktojë dhe detyrimet e reja për punonjësit e këtij institucioni, të cilat kanë për qëllim garantimin e standardeve të përcaktuara në mbrojtje të të dënuarve nga rekomandimet e Këshillit të Evropës.