Sheshi “Skënderbej” hyn në fazën e dytë të punimeve

Bashkia e Tiranës do të nisë nesër në mëngjes fazën e dytë të punimeve për rikualifikimin urban të Sheshit “Skënderbej”, që synojnë ta kthejnë në identitet lulishten pas monumentit të Skënderbeut, e cila do të jetë një hapësirë tërësisht çlodhëse, bëhet e ditur në një njoftim për mediat nga Bashkia e Tiranës.

Bashkia e Tiranes ka organizuar edhe një plan të ri të lëvizjes së automjeteve, që do të mundesojë zbatimin e projektit.

Masat do të fillojnë mbrëmjen e sotme, me qëllim që nesër në mengjes të jetë gjithçka gati për të nisur puna për fazën e dytë.

“Sipas Planit të Bashkisë së Tiranës, do të ndalohet qarkullimi i automjeteve në segmentin e rrugës “Çamëria”, nga kryqëzimi me rrugën “Ibrahim Rugova” deri në sheshin “ Skënderbej”, e thënë ndryshe, do të ndalohet qarkullimi në segmentin rrugor që kalon para selisë së Partisë Socialiste. Qarkullimi i automjeteve do të bëhet në rrugën “Ibrahim Rugova” në kryqëzimin me rrugën “Çamëria”, drejtim i detyruar drejt”, thuhet në njoftim.

Shumë shpejt pritet që të përfundojnë punimet për të gjithë sheshin “Skënderbej”, duke e bërë edhe më atraktiv jo vetëm për vizitorët vendas, por edhe për ata të huaj.