Ukraina dhe Rusia shkëmbejnë sulme para armëpushimit të shkurtër për Pashkën Ortodokse

Rusia dhe Ukraina shkëmbyen sulme me dronë gjatë mesnatës, vetëm disa orë përpara hyrjes në fuqi të një armëpushimi të shkurtër për Pashkën Ortodokse, i shpallur nga presidenti rus Vladimir Putin dhe i pranuar nga homologu i tij ukrainas, Volodymyr Zelensky.

Presidenti ukrainas paralajmëroi sot se Kievi do të përgjigjet “goditje për goditje” ndaj çdo shkeljeje të armëpushimit.

Sipas autoriteteve ukrainase, vendi u godit nga të paktën 160 dronë të lëshuar nga Rusia, duke shkaktuar katër viktima në lindje dhe jug të vendit.

Në rajonin jugor të Odesas, dy person u vranë pas një sulmi rus mbi një zonë banimi.

Sipas burimeve lokale, bombardimet ruse plagosën gjithashtu 14 persona në rajonin e Soumy, në verilindje të vendit dhe 10 të tjerë në Kramatorsk, në rajonin lindor të Donetskut.

Nga ana tjetër e frontit, dronë ukrainas goditën rajonin rus të Krasnodar, duke shkaktuar zjarr në një depo nafte dhe dëmtime në ndërtesa banimi, sipas autoriteteve vendore.

Gjithashtu, dy persona u vranë nga një sulm me dron ukrainas në zona të rajonit të Donetskut që ndodhen nën kontrollin rus, sipas autoriteteve të vendosura nga Moska.

Këto sulme ndodhën në një kohë kur Rusia dhe Ukraina kanë rënë dakord për një armëpushim të përkohshëm për Pashkën Ortodokse, i cili pritet të zgjasë nga e shtuna në orën 16:00 (13:00 GMT) deri të dielën në mbrëmje. /Ad.Ab./ a.jor.