Shfaqen hapur në publik tensionet brenda Shtëpisë së Bardhë
Ndërsa presidenti i Shteteve të Bashkuara akuzohet se po përpiqet të detyrojë Prokurorin e Përgjithshëm të largohet, drejtori i ri i komunikimit në Shtëpinë e Bardhë ka ndërmarrë sulme verbale kundër shefit të kabinetit të Presidentit Donald Trump. Disa i shohin këto zhvillime si një luftë të hapur brenda stafit në nivelet më të larta të administratës Trump.
Janë zhvillime që po ndodhin në sy të të gjithëve: Fjala është për ndarje brenda administratës, që kanë të bëjnë me prokurorin e përgjithshëm, i cili është kritikuar nga Presidenti Trump; ndërsa tani është shefi i kabinetit që sulmohet nga drejtori i ri i komunikimit.
Por, a do ta ruajë Presidenti besimin te shefi i tij i kabinetit Reince Priebus? Sekretarja e Shtypit e Shtëpisë së Bardhë, Sarah Huckabee Sanders refuzon të përgjigjet. Në komentet për gazetarët, ajo nuk i kushtoi rëndësi tensioneve mes drejtorit të komunikimit, Anthony Scaramucci dhe zotit Priebus, të cilin Scaramucci e ka quajtur burim i rrjedhjeve të informacionit për mediat.
“Presidentit i pëlqen kjo lloj konkurrence dhe e inkurajon atë,” tha ajo.
Por për disa udhëheqës republikanë në Kongres, kjo nuk është një garë e shëndetshme. Ata thonë se ky lloj komunikimi duhet të ndryshojë.
“Reince po bën një punë të shkëlqyer në Shtëpinë e Bardhë dhe mendoj se ka besimin e presidentit. Pra, në qoftë se këta dy zotërinj kanë dallime, këshilla ime do të ishte të ulen dhe t’i zgjidhin”, thotë Paul Ryan, Kryetar i Dhomës së Përfaqësuesve.
Zoti Scaramucci, i cili varet drejtpërdrejt nga presidenti e jo nga shefi i kabinetit, po hedh dyshime nëse dallimet e tij me zotin Priebus mund të zgjidhen.
“Disa vëllezër janë si Kaini dhe Abeli. Vëllezër të tjerë mund të luftojnë me njëri-tjetrin e përsëri të shkojnë mirë. Nuk e di nëse kjo mund të jetë e riparueshme. Varet nga presidenti”.
Nëse shefi i kabinetit humbet në këtë lojë pushteti dhe largohet, kjo mund të bëjë që të japin dorëheqjen edhe bashkëpunëtorë të tjerë besnikë të presidentit në Shtëpinë e Bardhë, që dikur kanë punuar me zotin Priebus.
