Shkodër, djali qëllon me armë zjarri nënën e vëllain
Një ngjarje e rëndë ka ndodhur sot në Dukagjin të Shkodrës, ku djali ka qëlluar më armë zjarri nënën e tij dhe vëllain.
Mësohet se të plagosur kanë ngelur Lina Qershia 56 vjeçe dhe Martin Qershia, 25 vjeç. Ndërkohë, dyshohet për një plagosje të mundshme dhe të autorit, Kol Qershia, 19 vjeç.
Ngjarja ka ndodhur mbrëmjes e sotme në fshatin Kir, ndërkohë gjendja shëndetësore e dy të plagosurve paraqitet kritike për jetën. Bëhet me dije se policia ka mbërritur në vendin e ngjarjes dhe po punon për zbardhjen e plotë të rrethanave që e kanë çuar djalin të plagos nënën dhe vëllain e tij.
Njoftimi për këtë ngjarje të rëndë është bërë nga vetë banorët e zonës, të cilët kanë lajmëruar policinë pasi kanë dëgjuar të shtëna armësh.
“Banorët kanë dëgjuar të shtëna armësh tek banesa e familjes ku ndodhi dhe krimi, e më pas kanë lajmëruar policinë. Dy të plagosurit po transportohen drejt spitalit Rajonal të Shkodrës, në gjendje të rëndë. Rruga nga fshati Kir drejt Shkodrës është një terren i thyer malor, ndaj e bën të vështirë dhe transportin e dy të plagosurve. Nuk kemi ende informacion nëse është arrestuar nga forcat e policisë autori i plagosjes”-përcolli për News24, gazetarja Eliona Kodra.
Ky është rasti i dytë për mbrëmjen e sotme ku raportohet për krim brenda familjes. Rreth orës 20:30 në Korçë, burri vrau bashkëshorten e tij më armë zjarri, fëmijën vetëm 1 vjeç dhe më pas i dha fund jetës duke u vetëvrarë.
Ndërkohë, vetëm dy ditë më pare një ngjarje e rëndë ndodhi në fshatin Suk të Fierit, ku një 73-vjeçar kreu masakër të vërtetë në familjen e tij, duke vrarë dy vëllezërit, kunatën dhe mbesën 17-vjeçare, e më pas u vetëvra me armë, pasi kundërshtonte fejesën e kësaj të fundit.
