Shqipëri-Kinë: Rritet bashkëpunimi tregtar, Kina partneri i tretë tregtar i Shqipërisë

Më 7 janar, ambasadorja e Kinës në Shqipëri Jiang Yu vizitoi Institutin e Statistikave të Shqipërisë dhe bisedoi me drejtoren e përgjithshme Mirela Muça mbi forcimin e shkëmbimeve dypalëshe. Këshilltari tregtar i ambasadës së Kinës në Shqipëri Lian Gang ishte gjithashtu i pranishëm në këtë takim.

Ambasadorja Jiang tha se vitet e fundit, shumë kompani kineze kërkojnë mundësi investimi në fushën e telekomunikimit, të energjisë, në fushën minerare, infrastrukturore etj., në të cilat një pjesë e kompanive kanë hapur zyra përfaqësimi. Bashkëpunimi tregtar midis Kinës dhe Shqipërisë po shtohet dhe sasia e tregtisë dypalëshe po rritet. Kina është partneri i tretë tregtar i Shqipërisë. Për të nxitur më tej bashkëpunimin tregtar dypalësh si dhe për të drejtuar e ndihmuar kompanitë kineze të investojnë në Shqipëri, ambasada kineze në Shqipëri riboton çdo vit librin “Busulla e investimeve në Shqipëri”.

Përmbajtjet e këtij libri përfshijnë fushat politike, ekonomike, shoqërore etj., burimet kryesore të këtyre të dhënave janë nga statistikat e INSTAT-it. Ambasada e Kinës është e gatshme të shtojë kontaktet me Institutin e Statistikave për bashkëpunimin tregtar midis Kinës e Shqipërisë.

Drejtorja Muça tha se Instituti Kombëtar i Statistikave është i gatshëm të ofrojë të dhëna për t’i njohur investitorët e huaj me Shqipërinë. Vitet e fundit, sipas standardit të BE-së, Instituti po përmirëson mënyrat e punës, ka ngritur cilësinë e punës duke nxjerrë raportet konkrete sipas planit. Instituti përkrah aktivisht nxitjen e bashkëpunimit tregtar Shqipëri-Kinë dhe është i gatshëm të shtojë rolin e tij në ngritjen e nivelit të bashkëpunimit tregtar dypalësh.