Shqipëri-Kuvajt, bashkëpunim në fushën e mjedisit

Shqipëria dhe Kuvajti do të zgjerojnë bashkëpunimin midis dy vendeve edhe në fushën e mbrojtjes së mjedisit dhe ruajtjes së zhvillimit të qëndrueshëm.

Qeveria shqiptare në mbështetje të ligjit “Për lidhjen e traktateve dhe marrëveshjeve ndërkombëtare”, me propozimin e ministrit të Punëve të Jashtme, miratoi në mbledhjen e së mërkurës, memorandumin e mirëkuptimit, ndërmjet Këshillit të Ministrave të Republikës së Shqipërisë dhe qeverisë së shtetit të Kuvajtit, për bashkëpunimin në fushën e mbrojtjes së mjedisit, ruajtjes së burimeve natyrore dhe zhvillimit të qëndrueshëm.

Bashkëpunimi Shqipëri- Kuvajt në fushën e mjedisit pason nënshkrimin në Tiranë, më 24 mars 2016 të Memorandumit të Mirëkuptimit mes dy vendeve, për bashkëpunimin në fushën e bujqësisë, mbrojtjen e bimëve, sigurinë ushqimore, shëndetin e kafshëve dhe peshkimit, midis Ministrit të Bujqësisë, Zhvillimit Rural dhe Administrimit te Ujrave Edmond Panariti dhe homologut të tij kuvajtian Al-Omair, pas nënshkrimit të memorandumit, deklaroi se ka ftuar sipërmarrësit kuvajtjanë të investojnë në sektorin rural shqiptar.