Shtesa dhe ndërtime deri në 250 m2, me çfarë leje duhet të pajisemi
Ndërtimet, shtesat apo ndryshime në pallate janë gjithmonë prezente në përditshmërinë tonë. Në një qytet ku gjithmonë shtohen banorët është e vështirë të gjesh qetësi në banesën tënde, pasi këto punime kryhen orë e pa orë, me leje dhe pa leje.
Asnjëherë deri tani dhe besoj e dinë të gjithë ata që jetojnë në Tiranë apo në qytete të mëdha një ndërtimi nuk merr fund. Dhe kjo besojmë do të vijojë për vite me radhë. Por mendohet të ketë një disiplinim dhe një kohë kur mund të kryhen këto punime.
Kështu nëse keni parashikuar që të bëni një ndërtim të ri ose një shtesë por, që nuk e kalon sipërfaqen prej 250m2 atëherë do t’ju duhet që të pajiseni me leje elektronike në sportelin e e-albania me një ndalesë. Agjencia e Zhvillimit të Territorit tregon se cilat janë hapat që duhet të ndiqet dhe dokumentacioni që duhet të plotësoni.
Duhet të keni parasysh se aplikimi do t’i dërgohet bashkisë dhe kjo e fundit do të kryejë vetë (përmes sistemit) të gjithë bashkërendimin me institucionet e tjera publike, me afate të qarta dhe pa vonesa.
Nëse institucionet nuk përgjigjen brenda 10 ditësh, kërkesa konsiderohet e miratuar në heshtje. Afati i shqyrtimit të lejes së ndërtimit nga bashkia është 15 ditë, ndërsa institucionet e tjera që duhet të japin mendimin e tyre në lidhje me lejen, duhet të përgjigjen brenda 10 ditëve pune.
Në rast se institucionet publike nuk i japin përgjigje bashkisë brenda 10 ditëve pune, miratimi/pëlqimi i tyre konsiderohet i dhënë në heshtje dhe bashkia mund të vijojë më tej me shqyrtimin e aplikimit.
Në çdo rast të mungesës së përgjigjes nga bashkia, brenda 60 ditësh nga dorëzimi i kërkesës së aplikuesit, sistemi gjeneron vendim për miratimin në heshtje.
Po cili është dokumentacioni i nevojshëm?
Dokumentet që duhet të paraqesë aplikuesi për t’u pajisur me leje ndërtimi pranë njësive të qeverisjes vendore janë:
– Kërkesa për leje ndërtimi, sipas formularit të aplikimit, të përcaktuar në sistemin elektronik të lejeve;
-Dokumente që vërtetojnë të drejtat pasurore të pronës/ave që marrin pjesë.
-Zhvillim, përfshirë marrëveshjet midis pronarëve dhe zhvilluesit ose/dhe palëve të treta;
-Plani i vendosjes së ndërtimit mbi fragmentin e hartës në gjendjen ekzistuese;
-Projekti i ndërtimit dhe relacioni përkatës;
– Grafiku paraprak i punimeve dhe afati i dorëzimit të objekteve, sipas fazave të zbatimit;
-Preventivi;
-Deklarata e projektuesit të licencuar, sipas formatit të aplikimit, të përcaktuar në sistemin elektronik të lejeve të ndërtimit, nëpërmjet së cilës konfirmohet përputhshmëria e projektit me lejen e zhvillimit, dokumentet e planifikimit e kontrollit të zhvillimit, në fuqi, dhe me legjislacionin që rregullon veprimtarinë e ndërtimit në Republikën e Shqipërisë, përfshirë dispozitat antisizmike, të sigurisë, mbrojtjes nga zjarri dhe higjieno-sanitare;
-Lejet, licencat, autorizimet apo aktet e miratimit, të nevojshme për ushtrimin e aktivitetit, në zbatim të legjislacionit të posaçëm për lejet, licencat dhe autorizimet, në rastet kur është e nevojshme që ato të paraqiten përpara marrjes së lejes së ndërtimit;
-Mandatpagesa/t e tarifës/tarifave të aplikimit;
-Kopje e policës së sigurimit të projektuesve, për mbulimin e përgjegjësive profesionale.
