Shtetasi shqiptar në paraburgim në Podgoricë, SDT e ngarkon për pastrim parash nga shitja e kokainës dhe ekstazisë

Prokuroria Speciale e Shtetit (SDT) e Malit të Zi ka urdhëruar hetim dhe ka hapur procedurë penale ndaj një shtetasi shqiptar me iniciale I.M., të cilin e ngarkon për veprën penale të pastrimit të parave, siç njofton Vijesti. SDT-ja veproi duke u nisur nga kallëzimi penal i Departamentit të Posaçëm të Policisë (SPO).

“Objekt i hetimit është fakti se i pandehuri mbante paratë dhe kryente transferimin e tyre duke e ditur, në momentin e marrjes, se ishin përfituar nga veprimtari kriminale – shitja e drogave narkotike, sepse 58.995 funtet britanike dhe skoceze, të përfituara nga shitja e kokainës dhe ekstazisë, i fshehu në disa vende të ndryshme në makinën me të cilën udhëtoi nga Kroacia në Mal të Zi, si edhe mbi vete”, thuhet në njoftimin e SDT-së që e përcjell Vijesti.

Paratë, sipas raportimit të Vijestit, u gjetën dhe u zbuluan nga oficerët doganorë në pikën kufitare Debeli Brijeg, në hyrje të Malit të Zi nga Kroacia.

Me propozim të SDT-së, gjyqtari hetues i Gjykatës së Lartë në Podgoricë i caktoi shtetasit shqiptar masën e paraburgimit, ndërsa hetimi për rastin vazhdon.