Shtyhet seanca fillestare ndaj Miljojko Gjorgjeviqit, mbrojtja nuk ishte pajisur me shkresat e lëndës

Seanca fillestare ndaj Miljojko Gjorgjeviqit, i akuzuar për krime lufte kundër popullsisë civile shqiptare në komunën e Zveçanit, është shtyrë të premten në Departamentin Special të Gjykatës Themelore në Prishtinë, pasi mbrojtja nuk ishte pajisur me shkresat e lëndës. Siç raporton IndeksOnline, leximi i aktakuzës nuk u bë dhe i akuzuari nuk u deklarua për fajësinë.

Sipas raportimit, Prokuroria Speciale dhe gjykata kishin tentuar t’ia dërgonin dokumentet mbrojtjes përmes adresës elektronike, por ajo nuk i kishte pranuar ato. Duke marrë parasysh këto rrethana, gjykata nxori aktvendim për shtyrjen e seancës, duke aprovuar kërkesën e avokatit të të akuzuarit. Sipas raportimeve të mediave serbe nga salla e gjyqit, seanca e radhës është caktuar për 2 nëntor, ndërsa mbrojtja ka kërkuar që shkresat e lëndës, me numrin e madh të dëshmitarëve dhe të dëmtuarve, t’i dorëzohen rregullisht përpara se i akuzuari të deklarohet mbi aktakuzën.

Prokuroria Speciale e Republikës së Kosovës ngriti aktakuzë ndaj Gjorgjeviqit më 11 tetor 2026. Siç ka raportuar “Betimi për Drejtësi”, ai akuzohet se, në cilësinë e komandantit të Repartit Policor në Komunën e Zveçanit dhe në bashkëkryerje me pjesëtarë të tjerë të forcave policore serbe, nën përgjegjësi individuale dhe komanduese, ka kryer vrasje, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullatës civile shqiptare gjatë viteve 1998–1999.

Në aktakuzë, ndër të tjera, thuhet se më 29 prill 1999 Gjorgjeviqi mori pjesë në operacionin e rrethimit të fshatit Zhazhë, gjatë të cilit u vranë tre civilë, u rrëmbyen shtatë të tjerë – trupat e gjashtë prej tyre u gjetën më vonë në varrezat e Suhodollit, ndërsa trupi i Adem Hazirit ende nuk është gjetur – si dhe u dogjën shtëpi e pasuri. Aktakuza e ngarkon atë edhe me keqtrajtimin e Avdi Pecit në një postbllok në “Urën e Hekurt” në vjeshtën e vitit 1998 dhe me torturimin e Sebahate Pecit gjatë regjistrimit të grave dhe fëmijëve në Zhazhë.

Gjorgjeviqi ishte arrestuar më 15 maj 2025 në lagjen Bërnjan të Mitrovicës së Veriut dhe ndodhet në paraburgim. Deri në nëntor të vitit 2022, kur serbët e veriut u larguan kolektivisht nga institucionet e Kosovës, ai ishte pjesëtar i Policisë së Kosovës. I akuzuari prezumohet i pafajshëm derisa fajësia e tij të vërtetohet me vendim të formës së prerë të gjykatës.