Sisi: Egjipti gati të marrë çdo masë për mbrojtjen e Arabisë Saudite, parlamenti mblidhet në seancë urgjente të dielën

Egjipti është gati të marrë çdo masë që Arabia Saudite kërkon për mbrojtjen e sigurisë dhe sovranitetit të saj, deklaroi të shtunën presidenti Abdel Fattah el-Sisi, siç njofton agjencia Anadolu përmes buletinit live të Anewz.

Duke folur në ceremoninë e diplomimit në Akademinë Ushtarake Egjiptiane në Kryeqytetin e Ri Administrativ, Sisi tha se do t’i kërkojë parlamentit të mblidhet në seancë urgjente për të autorizuar një veprim të tillë nëse Rijadi e kërkon zyrtarisht. “Do të marrim çdo masë për të mbrojtur Arabinë Saudite”, tha ai, duke shtuar se Egjipti qëndron fort për mbrojtjen e territoreve të vëllezërve të tij në Gjir, sipas Azernews.

Parlamenti egjiptian njoftoi më pas se seanca plenare do të mbahet të dielën, më 18 tetor, në ora 13:00, për të shqyrtuar kërkesën e presidentit për autorizimin e ndihmës së mundshme mbrojtëse për Arabinë Saudite.

Sisi theksoi se Egjipti nuk kërkon luftë e as sulm ndaj askujt: “Ne vetëm do ta mbrojmë Arabinë Saudite”, tha ai, duke nënvizuar se siguria kombëtare e Egjiptit dhe ajo e shteteve të Gjirit janë të ndërlidhura. Ai falënderoi gjithashtu Arabinë Saudite, Emiratet e Bashkuara Arabe dhe Kuvajtin për mbështetjen që i kanë dhënë Egjiptit në vitet e vështirësive ekonomike.

Deklaratat vijnë mes një vale sulmesh të Huthi-ve të Jemenit, të mbështetur nga Irani, ndaj objektivave energjetike dhe aviacionit në Arabinë Saudite, që kanë shtuar frikën për një zgjerim rajonal të luftës SHBA-Iran.