Sørensen javën e ardhshme në Prishtinë dhe Beograd, në fokus zbatimi i marrëveshjeve të dialogut

Përfaqësuesi i posaçëm i Bashkimit Evropian për dialogun ndërmjet Kosovës dhe Serbisë, Peter Sørensen, do të udhëtojë javën e ardhshme në Prishtinë dhe në Beograd, ku pritet të zhvillojë takime me liderët e të dyja vendeve, siç njofton RTK-ja.

Lajmin e ka konfirmuar për RTK-në zëdhënësja e Komisionit Evropian, Anita Hipper, e cila ka bërë të ditur se në fokus të vizitës së ndërmjetësuesit evropian do të jetë zbatimi i marrëveshjeve të arritura deri më tani në kuadër të dialogut.

Vizita e Sørensenit vjen në një kohë kur Brukseli po përpiqet ta ringjallë procesin e dialogut. Pak ditë më parë, Komisioni Evropian përsëriti se përfaqësuesja e lartë e BE-së për Politikë të Jashtme, Kaja Kallas, është e gatshme të presë së shpejti një takim të nivelit të lartë ndërmjet Kosovës dhe Serbisë, ndonëse ende nuk është caktuar ndonjë datë për të.

Diplomati danez Sørensen e mori detyrën e përfaqësuesit të posaçëm të BE-së për dialogun Beograd–Prishtinë në shkurt të vitit 2025, duke pasuar në këtë post Miroslav Lajçakun. Mandati i tij ka në qendër lehtësimin e dialogut dhe zbatimin e Marrëveshjes për Rrugën drejt Normalizimit të marrëdhënieve ndërmjet Kosovës dhe Serbisë, të arritur në vitin 2023, shumë prej dispozitave të së cilës mbeten ende të pazbatuara.

Takimet e javës së ardhshme pritet të shërbejnë për të vlerësuar gatishmërinë e të dyja palëve për hapat e radhës në proces. Ato zhvillohen ndërkohë që Serbia ndodhet në prag të zgjedhjeve të parakohshme parlamentare të 25 tetorit, ndërsa Kosova ka hyrë në një fazë të re institucionale pas konstituimit të institucioneve të reja.