Sot do të mësohet masa e sigurisë për prokuroren Vahide Badivuku

Gjykata Themelore në Prishtinë ka njoftuar se në këto momente fillon seanca dëgjimore lidhur me caktimin e masës së sigurisë ndaj prokurores Vahide Badivuku, nga Departamenti për Krime të Rënda në Prokurorinë Themelore të Mitrovicës, e cila së bashku me dy të arrestuar të tjerë, ndërmjetësues, dyshohen për vepra penale marrje të ryshfetit, keqpërdorimi i pozitës apo autoritetit zyrtar, si dhe ushtrim i ndikimit.

Ndërmjetësuesi i tretë sipas një komunikate të Prokurorisë Speciale të Kosovës gjendet në arrati.

E pandehura V.B., është arrestuar nën dyshimin se ka marrë ryshfet për t’i liruar disa vetura të sekuestruara, në një lëndë penale, të cilën ajo e ka pasur në hetime.

V.B. ka kërkuar ryshfet në shumën prej 22.000 euro (njëzetedymijë euro) përmes ndërmjetësuesve dhe pas dorëzimit të shumës në fjalë, si prokurore e rastit ka përpiluar kërkesën për lirim të automjeteve.

“Mbrëmë gjatë kontrollit në pikë kalimin kufitar në Merdare, është kontrolluar e pandehura V.B. dhe në çantën e saj janë gjetur shuma prej 5.000 euro, të cilat janë pjesë e 22.000 eurove të pranuara ryshfet”, thuhet në komunikatën e Prokurorisë Speciale.