Sot, përfundimisht programi qeverisës

Grupet punuese të PDK-së dhe LDK-së janë futur në fazën finale. Madje grupi i cili po punon në harmonizimin e programit qeverisës, pretendohet të ketë mbaruar punën.
Anëtarë të këtij grupi kanë paralajmëruar se të hënën (sot) do të miratohet përfundimisht programi qeverisës në bazë të të cilit do të qeveriset vendi në 4 vjetët në vazhdim.

Në fazën finale është edhe ndarja e dikastereve, mirëpo anëtarë të këtij grupi nuk kanë dashur të zbulojnë ditën se kur do të bëhet ndarja përfundimtare e posteve.

Arsim Bajrami nga Partia Demokratike e Kosovës, i cili e kryeson grupin për harmonizimin e programit qeverisës nga kjo parti, ka thënë se grupet punuese do ta mbarojnë punën e tyre sot.

“Grupet punuese të të dy partive të hënën (sot) do ta përfundojnë punën dhe do ta miratojmë harmonizimin e programit qeverisës për periudhën 2014- 2018”, ka thënë Bajrami.

Gazeta ka provuar të marrë qëndrim edhe nga Avdullah Hoti i LDK-së, i cili e kryeson këtë grup nga kjo parti, mirëpo ai nuk i është përgjigjur thirrjeve të shumta.

Edhe ndarja e posteve ministrore është në fazën finale.