Stuhija shkatërruese në Australi

Stuhi të fuqishme kanë goditur dhunshëm Uellsin e Ri të Jugut, në shtetin e Australisë, duke u marë jetën të paktën 3 personave.

Një nga zonat më të prekura është ajo në Dungog, në veri të Sidnejit, ku shtëpitë janë rrëmbyer nga përmbytjet dhe ku janë gjetur tre viktimat, dy burra dhe një grua.

Aktualisht rreth 215 mijë shtëpi kanë mbetur pa energji elektrike. Njerëzve u është bërë thirrje të qëndrojnë në banesat e tyre, pasi Agjencia Meteorologjike Australiane ka paralajmëruar mot më të ashpër në ardhje që mund të prekë zona të shtetit natën e së martës.

Zonat në fjalë, ku parashikohet të përplasen shira dhe erëra shkatërruese janë Sidneji, Hanter dhe Ilauarra. Erëra deri në 135 kilometra në orë u regjistruan në disa zona, ndërkohë që pritet të bjerë deri në 200 milimetra shi.

Kryeministri i shtetit të Uellsit të Ri të Jugut, Mike Baird u ka bërë thirrje punëtorëve në tre zonat e sipërpërmendura që të shkojnë në shtëpi në rast se kushtet e motit përkeqësohen.

“Është një stuhi tmerrësisht e madhe që po përplaset duke bërë kërdinë në mbarë shtetin. Prioriteti ynë në këto momente është të kalojmë orët në vazhdim dhe të mbrojmë jetën e çdo njeriu”, ka deklaruar Baird.

Ndërkohë, një paralajmërim është dhënë mbi rrezikun që mund të vijë nga tejmbushja e lumenjve Paterson dhe Uilliams në Hanter.

Shërbimi Shtetëror i Emergjencave deklaroi se kishte marrë mbi 4 mijë e 400 telefonata për ndihmë dhe se kanë kryer dhjetëra operacione shpëtimi.