Sulm antisemit, digjen katër autoambulanca të një shërbimi hebre

Një sulm i rëndë ndaj një shërbimi komunitar hebre ka ndodhur në veri të Londrës, ku katër autoambulanca janë djegur gjatë natës në zonën e Golders Green, sipas BBC.

Autoritetet britanike kanë konfirmuar se ngjarja po hetohet si krim urrejtjeje me motiv antisemitik, duke rritur shqetësimet për sigurinë e komuniteteve fetare në vend.

Sipas Policisë Metropolitane të Londrës, autoambulancat i përkisnin një shërbimi komunitar hebre dhe u përfshinë nga flakët në rrethana të dyshimta. Hetimet janë në zhvillim për të identifikuar autorët dhe për të zbardhur motivet e plota të sulmit.

Kryeministri britanik Keir Starmer e cilësoi incidentin si “thellësisht tronditës” dhe “të tmerrshëm”, duke dënuar ashpër çdo formë urrejtjeje antisemitike.

Ndërkohë, Sekretari i Shëndetësisë Wes Streeting tha se fatmirësisht nuk ka raportime për të plagosur, por theksoi se shoqëria duhet të qëndrojë e bashkuar kundër urrejtjes.

Autoritetet kanë shtuar praninë policore në zonë dhe po bashkëpunojnë me komunitetin lokal për të garantuar sigurinë dhe për të parandaluar incidente të tjera të ngjashme. Ngjarja ka nxitur reagime të forta nga liderë politikë dhe organizata, të cilët kanë bërë thirrje për tolerancë dhe bashkëjetesë.

Hetimet vijojnë, ndërsa policia u ka bërë thirrje qytetarëve që mund të kenë informacion të dobishëm të paraqiten për të ndihmuar në zbardhjen e plotë të rastit. /Ad.Ab./