Sulm kibernetik godet 3 aeroporte në Britani, aksesohen të dhënat e 8.7 milionë klientëve

Tre aeroporte të mëdha në Mbretërinë e Bashkuar janë goditur nga një incident kibernetik, gjatë të cilit janë aksesuar të dhënat e rreth 8.7 milionë klientëve, ka bërë të ditur Manchester Airports Group (MAG).

Kompania, e cila operon aeroportin e Mançesterit, London Stansted dhe East Midlands, deklaroi se siguria e pasagjerëve dhe ajo e aviacionit nuk janë cenuar. Po ashtu, as MAG dhe as sistemi i prekur nga sulmi nuk ruanin të dhëna bankare apo të pagesave të klientëve.

Sipas kompanisë, pjesa më e madhe e të dhënave të aksesuar përbëhej nga adresat e emailit, kryesisht të lidhura me regjistrimet për përdorimin e Wi-Fi-t brenda terminaleve.

Në sulm janë aksesuar gjithashtu numra telefoni, targa automjetesh dhe kode postare.

Hakerët kërkuan një shpërblim financiar përmes një sulmi ransomware, por MAG tha se nuk e ka paguar shumën e kërkuar, e cila nuk është bërë publike.

Një zëdhënës i kompanisë deklaroi të enjten se rreziku është kufizuar dhe se janë marrë masat e nevojshme në bashkëpunim me këshilltarë specialistë të sigurisë kibernetike. Sipas tij, incidenti nuk ka shkaktuar ndërprerje të operacioneve dhe aeroportet vijojnë të funksionojnë normalisht, përfshirë shërbimet e parkimit.

Në një email të dërguar klientëve, MAG u bëri thirrje udhëtarëve të tregojnë kujdes ndaj komunikimeve të dyshimta.

“Ju bëjmë thirrje të jeni veçanërisht të kujdesshëm ndaj email-eve, telefonatave ose mesazheve të papritura që pretendojnë se vijnë nga ne. Ne nuk do t’ju kontaktojmë kurrë në mënyrë të papritur për t’ju kërkuar pagesa ose informacione bankare”, thuhej në mesazh.

Ekspertët e sigurisë kibernetike paralajmërojnë se edhe pse të dhëna si adresat e emailit, numrat e telefonit, kodet postare dhe targat mund të duken më pak të ndjeshme se informacioni financiar, grumbullimi i tyre në një shkallë kaq të madhe mund të jetë i vlefshëm për kriminelët kibernetikë.

Beverley Griffiths, pedagoge e lartë në fushën e sigurisë dhe qëndrueshmërisë në Buckinghamshire New University, tha se kombinimi i këtyre të dhënave mund t’u mundësojë sulmuesve të krijojnë profile të individëve dhe të realizojnë sulme të synuara phishing, manipulim social dhe mashtrime financiare.

Ajo u bëri thirrje klientëve të tregojnë vigjilencë ndaj email-eve, mesazheve apo telefonatave të dyshimta dhe të verifikojnë çdo kërkesë për informacion personal përmes kanaleve zyrtare.

Aeroportet e prekura përpunojnë dhjetëra miliona pasagjerë çdo vit. Më shumë se 32 milionë pasagjerë udhëtuan përmes aeroportit të Mançesterit gjatë vitit të kaluar, ndërsa mbi 30 milionë kaluan përmes London Stansted dhe rreth 4 milionë përmes East Midlands.