Tabaku: Buxheti 2015, shënjues i thellimit të krizës

Deputetja e Partisë Demokratike, Jorida Tabaku deklaroi të martën se buxheti i miratuar nga Kuvendi nuk mendon për qytetarët. Sipas Tabakut, nga ky buxhet janë ulur apo hequr taksa mbi disa biznese preferenciale, të cilët duke patur mundësinë për të qenë pranë qeverisë kanë mundur që të ndikojnë në uljen e tyre. Përmes këtij buxheti, vijoi Tabaku, qeveria pretendon se vitin e ardhshëm Produkti i Brendshëm Bruto mund të shkojë rreth 800 milionë dollarë nga të cilat 460 milionë dollarë do t’ia marrë shqiptarëve nga xhepat e tyre. Tabaku vuri në dukje se ky buxhet është shënjuesi i një thellimi të krizës ku qytetarët do të vuajnë pasojat e një politike klienteliste dhe shkatërruese të konsumit. “Buxheti shtrydh qytetarin duke i hapur portat një recensioni ekonomik, ku vetëm qeveria është e lumtur me shpenzimet e saj luksoze”, deklaroi Tabaku në një dalje publike nga selia e PD-së. Kuvendi miratoi në orët e para të mëngjesit, pas një seance që zgjati mbi 13 orë, p/buxhetin për vitin 2015, ndërsa opozita nuk ishte e pranishme në seancë.