Tahiri: Asnjë polic privat nuk do të paguhet më vetëm 18 mijë lekë

Ministri i Brendshëm, Saimir Tahiri, në një takim me shoqëritë private të sigurisë fizike, deklaroi se “policët privatë nuk mund të paguhen vetëm 180 mijë lekë të vjetra dhe të ofrojnë siguri”.

“Policia private duhet të ketë standardet më moderne europiane dhe nuk mund të presim standarde kur polici privat paguhet me 180 mijë lekë të vjetra. Policia e Shtetit do të inspektojë këto standarde dhe do të luftojmë që policët privatë të paguhen sa e kërkon ligji. Një muaj është i rëndësishëm që të zbatoni detyrimet ligjore, duke paguar me minimumin e parashikuar nga ligji çdo punonjës, pra 330 mijë lekë të vjetra”, tha Tahiri.

Ministri shtoi se “potenciali financiar në shërbimin e shoqërive private të sigurisë do të vihet në dispozicion për të pasur cilësi më të mirë në shërbim”.

“Kontratat tuaja në vit shkojnë rreth 20 milionë euro dhe kjo e kapërcen disa herë buxhetin e Policisë së Shtetit, por gjithë ky potencial financiar nuk duhet të shkojë në disa xhepa të caktuar për përfitim. Duhet të shkojë për pagat e policëve privatë”, deklaroi Tahiri