Të drejtat e njeriut, “AI”: U prishën banesat e romëve, dhunë në familje e ndaj grave
Organizata ndërkombëtare e të drejtave të njeriut, “Amnesty International” publikoi raportin e saj vjetor mbi gjendjen e të drejtave të njeriut në botë, i cili merr në analizë situatën në 160 vende të ndryshme të globit.
Raporti evidenton disa probleme, duke nisur nga gjendja e komuniteteve rome dhe egjiptjane, veçanërisht e drejta e tyre për strehim. Vëmendje i është kushtuar edhe situatës së rëndë ekonomike, që ka detyruar me mijëra shqiptarë të largohen drejt Europës Perëndimore, si dhe mbrojtja e pamjaftueshme e viktimave të dhunës në familje.
Organizata e ka parë me shqetësim shkatërrimin e banesave të shumë familjeve rome në muajin korrik, të identifikuara si ndërtime të paligjshme, si dhe faktin që autoritetet nuk kanë lejuar legalizimin e ndërtimeve në përputhje me ligjin e vitit 2014.
Dhuna ndaj grave dhe vajzave, një temë që ngrihet shpesh në raportet ndërkombëtare për gjendjen e të drejtave të njeriut në Shqipëri, përfshihet edhe në raportin e sivjetshëm të “Amnesty International”.
Megjithë kërkesat e shumta pranë autoriteteve të grave dhe vajzave, për mbrojtje nga dhuna në familje, vetëm një përqindje e vogël e këtyre kërkesave janë miratuar, pasi viktimat tërheqin padinë, si rezultat i presionit nga të afërmit.
Raporti tërheq vëmendjen edhe në një tjetër ngërç të shoqërisë sonë: kulturën e pandëshkueshmërisë. Për të ilustruar këtë pohim, sillet shembulli i ish-drejtorit të Policisë së Shtetit, Hysni Burgaj, dhe zëvendësit të tij, Agron Kuliçaj, që nuk zbatuan urdhërarrestet për anëtarë të Gardës Kombëtare, të akuzuar për vrasjen e 4 protestuesve në janar 2011.
Po ashtu mbetet problem, – thekson “Amnesty International”, – gjendja në burgje dhe qendrat e paraburgimit, ku të burgosurit dhe të ndaluarit keqtrajtohen dhe mbahen në kushte të papërshtatshme.
