Të paktën 11 civilë të vdekur në Donetsk, luftimet intensifikohen

Të paktën 11 civilë janë vrarë në 24 orët e fundit në Donetsk, bastion i separatistëve prorusë, që gjendet nën sulmet e vazhdueshme të artilerisë së rëndë, njoftoi sot në mëngjes bashkia e qytetit.

“Në Donetsk 11 civilë janë vrarë gjatë 24 orëve të fundit dhe tetë të tjerë janë plagosur”, njoftoi bashkia në një komunikatë.

Dje luftimet përfshinë gjatë ditës qendrën e Donetskut, bastion i rebelëve që nomëron rreth një milion banorë.

Goditjet e vazhdueshme me artileri të rëndë kanë prekur shumë godina mes të cilave edhe selinë e prokurorisë që ishte nën kontrollin e kryengritësve si dhe një Universitet.

Nuk ishte e mundur deri tani të përcaktohej origjina e këtyre sulmeve, por OKB-ja ka akuzuar në një raport në fund të korrikut të dyja palët si ushtrinë ukrainase dhe separatistët se përdorin artileri të rëndë në zona të banuara.

Një zëdhënës ushtarak ukrainas nga ana e tij ka shpallur se janë marrë nga kontrolli i separatistëve tre lokalitete në lindje të vendit, Oleksandrivske dhe Boulanivske, 47 kilometra në verilindje të Donetskut, dhe Tchornoukhine, 65 kilometra në veriperëndim të Luganskut.