Protestat “Pa Mbretër” kundër Trumpit tërheqin mijëra njerëz në mbarë Shtetet e Bashkuara

Turma të mëdha njerëzish dolën në rrugë të shtunën në protestat “No Kings” (“Pa Mbretër”), të planifikuara në mbi 2,600 qytete dhe qyteza në mbarë vendin.

Protesta masive në qytetet amerikane

Në Manhattan, mijëra protestues marshuan përgjatë Avenues së 7-të nën një atmosferë ngjashme me karnavalet, me pankarta shumëngjyrëshe që mbanin mbishkrime si “Nuk betohem për asnjë mbret”. Disa kishin veshur kostume simbolike, përfshirë bretkosat e fryra që aktivistët në Portland filluan t’i përdorin për të tallur përpjekjet e Shtëpisë së Bardhë për t’i paraqitur si anarkistë ose terroristë të brendshëm.

“Jo më Trump!” brohorisnin protestuesit, ndërsa valëvitnin flamuj amerikanë. Znj. Diaz, 39 vjeç, tha se për protestën kishte mësuar në TikTok dhe vendosi menjëherë të merrte pjesë. Ajo punon për qeverinë federale si zyrtare sigurimesh dhe nuk është paguar që nga mbyllja e qeverisë, por tha se mbështet përpjekjet e politikanëve demokratë për të ulur kostot e kujdesit shëndetësor.

Një protestë e madhe, tha ajo, mund t’i inkurajojë drejtuesit që punojnë për këtë qëllim.

Zëri i protestuesve në shtetet jugore

Në Atlanta, mijëra vetë u mblodhën në një parkim në qendër të qytetit, ku megjithëse atmosfera ishte e qetë, shumë shprehën zhgënjim për taktikat e administratës Trump.
Ndër ta ishte edhe Catherine Browning, shtetase britanike, e veshur me një kostum të gjelbër bretkose.

“Duhej të isha këtu sot,” tha ajo. “Ka shumë padrejtësi që po ndodhin ndaj shumë njerëzve.” Ajo përmendi veprimet e agjentëve federalë të emigracionit që, sipas saj, “po i çnjerëzojnë njerëzit”.

Znj. Browning, 55 vjeç, tha se tani e mban gjithmonë kartën e gjelbër me vete dhe nuk ka aplikuar për nënshtetësi nga frika se mund të arrestohet dhe dëbohet. “Duhet të flasim për të drejtat tona,” shtoi ajo.

Bianca Diaz, që mori pjesë me vajzën e saj 6-vjeçare të veshur si një aksolot (një lloj salamandre), tha: “Desha që ajo ta shihte këtë me sytë e saj.”

“No Kings Day” në 50 shtete

Dita e njohur si “No Kings Day” u zhvillua si vazhdim i një proteste të madhe në qershor, kur u mbajtën rreth 2,000 tubime në të 50 shtetet. Këtë herë, organizatorët raportuan mbi 600 protesta shtesë, shumica në zona rurale.

Edhe pse sondazhet nuk kanë treguar ndryshime të mëdha në popullaritetin e presidentit Trump, protestat u zhvilluan edhe në zona konservatore. Në Madison County, Kentucky, protestuesit u rreshtuan përpara gjykatës lokale, duke brohoritur “Kështu duket demokracia!” dhe “Pa mbretër në Amerikë!”.

Arsyet pas protestave

Organizatorët thanë se demonstratat u nxitën nga veprimet e fundit të presidentit Trump — përfshirë rolin e tij në mbylljen e qeverisë, sulmet ndaj arsimit të lartë, ndërhyrjet në Departamentin e Drejtësisë për të ndjekur kundërshtarët politikë, bastisjet e emigracionit dhe vendosjen e trupave federale në qytete.

“Publiku po e kupton gjithnjë e më shumë se kjo është një garë afatgjatë,” tha Hunter Dunn nga grupi progresist 50501, që ndihmoi në organizimin e protestave.

Në shumë qytete, atmosfera ishte festive, me muzikë, pankarta dhe solidaritet. Në Grant Park të Çikagos, Marilyn Ricken, 80 vjeç, tha se ishte pjesëmarrëse edhe në protestën e qershorit, por këtë herë ndjente më shumë urgjencë. “Kështu ndodh ndryshimi,” tha ajo.

Solidaritet ndërkombëtar

Protesta u mbajtën edhe jashtë SHBA-së. Në Paris, demonstruesit mbanin pankarta kundër Trumpit; në Gjermani, tubime u zhvilluan në katër qytete, përfshirë një para Portës së Brandenburgut në Berlin. Në Britani dhe Spanjë, protestat u zhvilluan nën sloganin “Pa tiranë”.

Sipas profesorit të shkencave politike Jeremy Pressman nga Universiteti i Connecticut, forca e mandatit të dytë të Trumpit ka nxitur protesta më të fuqishme: “Sa më intensive të jenë veprimet, aq më e fortë do të jetë kundërpërgjigjja.”

Një lëvizje që po zgjerohet

Sipas të dhënave të projektit Crowd Counting Consortium, dita “No Kings” e qershorit ishte ndër ditët më të mëdha të protestës në historinë e SHBA-së. Analizat tregojnë se protestat po shtrihen edhe në zona ku shumica e votuesve kanë mbështetur republikanët.

Organizatorët — përfshirë grupet Indivisible dhe MoveOn — thanë se demonstratat kanë marrë mbështetje të gjerë publike dhe përkrahje nga figura të njohura si aktori Robert De Niro.

“Po ngrihemi përsëri, pa dhunë, për të shpallur: ‘Pa mbretër!’” tha De Niro në një video mesazh.

Kujtesë historike

Slogani “No Kings” i referohet Mbretit George III, i cili ushtroi pushtet mbi kolonitë amerikane që kërkonin pavarësinë. Organizatorët e lëvizjes e krahasojnë Trumpin me një sundimtar autoritar.

Megjithatë, protesta e qershorit në Salt Lake City përfundoi tragjikisht, kur një protestues u vra aksidentalisht gjatë një përplasjeje të armatosur. Kjo ngjarje, thanë shumë pjesëmarrës të rinj, i shtyu të bashkoheshin këtë herë.

“Allie Burton, 40 vjeç, tha: ‘Dua që fëmijët e mi të kenë një qeveri më të mirë. Trump po shkatërron të drejtat e njerëzve, veçanërisht të grave.’”

Kundërpërgjigjja republikane

Udhëheqësit republikanë e kanë dënuar protestën, duke e quajtur “manifestim urrejtjeje ndaj Amerikës” dhe duke pretenduar pa prova se pjesëmarrësit janë të paguar. “Janë të gjithë ata të krahut pro-Hamas dhe antifa,” tha kryetari i Dhomës së Përfaqësuesve, Mike Johnson, në Fox News.

E pyetur për një reagim nga Shtëpia e Bardhë, zëdhënësja Abigail Jackson u përgjigj shkurt: “Kujt i intereson?”

Zëri i qytetarëve në shtetet konservatore

Në qytetet e “shteteve të kuqe”, protestuesit thanë se ndienin detyrimin të bënin të dëgjohej zëri i tyre. “Ke ndjesinë se zëri yt nuk dëgjohet shumë,” tha Michael Flanagan, 46 vjeç, që mori pjesë në një tubim në Memphis. “Por nuk kam parë kurrë më parë një entuziazëm të tillë.”

Ai shtoi se pjesëmarrja e tij në lëvizjen No Kings e bëri të ndihej më pak i vetëm. “Të dalësh si një njeri i zakonshëm dhe të shohësh gjithë këtë, është diçka e mrekullueshme,” tha ai.